Ўзбекистон ва Озарбойжон ID-картани ўзаро тан олиш масаласини муҳокама қилмоқда

ID-карталардан фойдаланиш Ўзбекистон ва Озарбойжон фуқароларига хорижга чиқиш паспортини олмасдан туриб чегарани кесиб ўтиш имконини беради.

Фото: Getty images

Ўзбекистон ва Озарбойжоннинг тегишли вазирлик ва идоралари вакиллари ўртасида икки давлат фуқароларининг ID-карталарини чегарадан ўтиш учун расмий ҳужжат сифатида тан олиш имконияти муҳокамасига бағишланган онлайн учрашув ташкил этилди. Бу ҳақда «Дунё» хабар берди.

Қайд қилинишича, бу чора саёҳатларни енгиллаштириш ва икки томонлама алоқаларни мустаҳкамлашга хизмат қилади.

Томонлар фуқаролар ҳаракатини соддалаштириш, икки томонлама муносабатларни мустаҳкамлаш ва миграция сиёсати соҳасидаги ҳамкорликни кенгайтиришга қаратилган ушбу қадам муҳим аҳамиятга эга эканлигини таъкидлаган.

ID-карталардан фойдаланиш Ўзбекистон ва Озарбойжон фуқароларига хорижга чиқиш паспортини олмасдан туриб чегарани кесиб ўтиш имконини беради, бу эса саёҳат қилиш қулайлигини оширади ва мамлакатлар ўртасидаги интеграцияни мустаҳкамлайди.

Шунингдек, мазкур қарорнинг қабул қилиниши Ўзбекистон ва Озарбойжон ўртасидаги савдо-иқтисодий, маданий ва сайёҳлик алоқаларини ривожлантиришга ижобий таъсир кўрсатиши кутилмоқда.

#туризм #Озарбойжон #ID-карта