Давлат раҳбарига кўра, сўнгги беш йилда ихтисослаштирилган марказларга 7,5 трлн сўм маблағ ажратилди, минглаб замонавий ускуналар ўрнатилди. «Дори етмаяпти деб бирорта марказ айта оладими?» дея савол қўйган президент асосий муаммо — ресурслардан самарали фойдаланиш эканини таъкидлади.
«Мана шу маблағлар, ускуналар ва дори-дармонлар қандай ишлатиляпти? Афсуски, ускуналарнинг қувватидан бор-йўғи 25 фоиз фойдаланилмоқда», — деди президент.
Шу муносабат билан:
- рақамлаштириш, халқаро ҳамкор топиш, клиник протоколларни янгилаш;
- илғор диагностика, профилактика ва даволашни уддалайдиган замонавий жамоаларни шакллантириш;
- натижа кўрсатмаган марказ, туман, вилоят бошқармаларининг фаолиятини кескин қайта кўриб чиқиш зарурлиги таъкидланди.
Шунингдек, ҳар бир маҳалла ва туман кесимида қайси касалликлар кўпайган/камайгани бўйича аниқ таҳлил ўтказиб, профилактика ва даволаш режаларини жорий этиш вазифаси қўйилди. Республика марказлари эса бундай таҳлил ва ёндашув билан ишни пастда ташкил этиш, катта маблағ эвазига берилган энг замонавий ускуналардан тўлиқ қувватда фойдаланишни таъминлаши шартлиги кўрсатиб ўтилди.
