Lacetti учун керак бўладиган эҳтиёт қисмлари ҳали ҳам заводларда мавжуд, бу эса ишлаб чиқаришни давом эттиришга имконият беряпти, дея Kun.uz'га маълум қилди “Ўзавтосаноат” ахборот хизмати. Компания вакили Lacetti ишлаб чиқариш қачонгача давом этишини аниқ айта олмади, лекин бу бирданига тўхтамаслигини таъкидлади.
21 май куни UzAuto Motors компанияси Chevrolet Lacetti автомобили учун 3200 дона шартнома тузилганини эълон қилди. Статистика агентлигига кўра, 2024 йилнинг дастлабки 4 ойи давомида 10 954 дона Lacetti ишлаб чиқарилган.
Аввалроқ, компания 2024 йилдан бу русумидаги автомобил ишлаб чиқаришни бутунлай тўхтатишини маълум қилган, буни General Motors компаниясининг глобал савдо сиёсати билан боғлаганди.
“Ўзавтосаноат” ахборот хизматининг Kun.uz'га маълум қилишича, Lacetti учун керак бўладиган эҳтиёт қисмлари ҳали ҳам мавжуд. Бу эса ишлаб чиқаришни давом эттиришга имконият беряпти.
“Lacetti ишлаб чиқариш тахминан қачонгача давом этишини аниқ айта олмайман. Бу бирданига тўхтамайди. Яқин 7 кун ичида харидорларга яна шартнома берилиш-берилмаслиги ойдинлашади”, – деди компания ахборот хизмати расмийси.
Маълумот учун, UzAuto Motors Lacetti ишлаб чиқаришни 2003 йилдан бошлаган. 2008 йилдан бу моделни серияли йиғиш йўлга қўйилган. 2013 йилда эса Lacetti-2 (ҳозирги Gentra) ишлаб чиқарилиши бошланган, бир йил ўтиб биринчи авлод Lacetti конвейердан олинган.
