Disney фильмлари рекорд натижани қайд этди

Walt Disney Studios фильмлари 2016 йил жаҳон прокатида 5,02 миллиард доллар ишлаб олди. Шуниси диққатга сазоворки, бундай кўрсаткичларга рекорд муддатда эришилди. Бу ҳақида Deadline нашри хабар берди. 

"Капитан Америка: Фуқаролик уруши" фильми бутун дунё бўйлаб 1,15 миллиард доллар, "Зутопиа" - 1,02 миллиард доллар, "Чангалзор китоби" - 936 миллион доллар, "Дорини излаб" - 643 миллион доллар тўплади. 

Бундан аввалги рекорд натижа Universal'га тегишли бўлган: 2015 йилнинг 17 июлида "Юра даври дунёси" фильмидан тушган пуллар 5 миллиард долларга етган. Disney'га келадиган бўлсак, студия ўз тарихида иккинчи марта 5 миллиард доллар кўрсаткичини қайд этди. 

2016 йилда Disney "Питнинг аждарҳоси" (августда), "Доктор Стрэнж" ва "Моана" (иккаласи ҳам ноябрь ойида чиқади), "Қароқчи:Юлдузлар жанги ҳикоялари" (декабрда) каби ленталарини тақдим этиши кутилмоқда.