4 сентабр куни АҚШнинг Вашингтон штати Сиэтл шаҳрида Ўзбекистон бош консуллиги расман очилди. Маросимда икки давлатдан расмийлар, Вашингтон штати вакиллари ва ватандошлар қатнашди. Kun.uz билан гаплашган Сиэтлдаги бош консул Аҳрор Бурҳоновга кўра, бу штатда 3 мингдан ортиқ ўзбеклар яшайди ва имкониятлар океандек кўп.
Сиэтл АҚШнинг шимоли-ғарбий нуқтаси, Тинч океани бўйи ҳудудидаги штат – Вашингтоннинг энг катта шаҳарларидан. IT, муҳандислик ва ишлаб чиқариш, хизмат кўрсатишда юксак натижаларга эришган бу ҳудудда катта компаниялар офислари жойлашган. Штатда бугун 3 мингдан ортиқ ўзбеклар яшайди. Ўзбекистон эса АҚШда навбатдаги ваколатхона учун айнан Сиэтлни танлади.
4 сентабр куни бош консулликнинг расмий очилиш маросими ўтказилди. Тадбирда АҚШдаги элчи Фурқат Сидиқов, Ню-Йоркдаги бош консул, БМТдаги доимий вакил, АҚШ томонидан расмийлар, Вашингтон штати раҳбарияти ва юртдошларимиз, фаоллар, бизнес доиралари вакиллари қатнашди.
“АҚШ билан алоқаларимизнинг энг яхши давридамиз”, дейди элчи сўзга чиқаркан. Бош консул сифатида фаолиятини бошлаган Бурҳонов эса ишонч учун Америка томонига миннатдорлик билдирди.
“Биз ҳаммасини нолдан бошламаяпмиз, Сиэтл билан алоқалар бундан 50 йил аввалга бориб тақалади. Бу ердаги имкониятларимиз океандек”, дейди у.
Эслатиб ўтамиз, Ўзбекистоннинг бош консуллиги АҚШнинг Ню-Йорк шаҳрида ҳам мавжуд ҳамда Жамил Шарапов бош консул сифатида ишлаб келмоқда.
