«Сити» қаторасига уч ғалабадан кейин яккапешқадамга айланиб олди, лекин бугун «Арсенал» ва «Челси» ўйинидан кейин вазият ўзгариши мумкин. Европа футболида шанба оқшомида рўй берган асосий воқеалар, ўйинлардаги голлар ва турнир жадвалларидаги вазият.
Мавсумни жуда тетик бошлаган «Нюкасл» («Ливерпул» билан 2:2, «Тоттенҳэм» устидан 2:0 ҳисобидаги ғалаба) «Борнмут» билан ўйинда кутилганидек жиддий муаммоларга дуч келди: «олчалар» бунгача қаторасига саккизта ўзаро ўйинда «қарғалар»га ютқазмаган, бу ўйинларнинг тенг ярмида ғалаба қозонганди. Бу сафар ҳам меҳмонлар ўз вазиятларидан максимум натижа чиқариб олишди. Ҳисобни очган Таверне олисдан йўлланган зарбадан кейин рикошет орқали йўналишини ўзгартирган тўпга барчадан биринчи бўлиб етиб борди, кейин эса унинг қанотдан узатмаси Тиаунинг автоголига олиб келди. Фақат иккинчи голдан кейингина мезбонлар ўзига келишди ва Барнс олис «тўққизлик»ни аниқ нишонга олиб, жамоасини ўйинга қайтарди. Ўйин охирида эса айнан унинг узатмасидан кейин Жейкоб Рэмси ҳисобни тенглаштирди. «Нюкасл» енгилмас жамоа бўлиб қолмоқда.
Френк Лэмпард бошқарувидаги «Ковентри» АПЛга қайтишини қаторасига икки мағлубият билан бошлаганди, «Этиҳад»да ҳам ушбу салбий серияни якунлашнинг имкони бўлмади. Шу билан бирга, чемпионшипдан чиққан ушбу жамоани буткул иложсиз аҳволда қолди деб бўлмайди. Аввалига Ҳусановнинг дарвозабонга узатмаси голга айланиб кетишига бир бахя қолди, Доннарумма сўнгги сонияда дарвоза чизиғини тўлиқ кесиб ўтмаган тўпга етиб боришга улгурди. Кейинги дақиқада эса Авонийи дарвозабон билан яккама-якка вазиятга чиқиб борди, аммо тўғри зарба беролмади. Фақат бўлим ўрталаридан ўтганида Ҳоланд Семенё ўнг қанотдан дарвозабон ҳудудига оширган тўпни бош билан рақиб дарвозасига киритиб юборди.
Мавзуга оид
Эрлинг энди АПЛда 2022/23 йиллар мавсумидан буён бошда урган голлари сонини 20 тага етказиб олди – бу давр оралиғида унга энг яқин натижа 16 гол. Аммо куннинг асосий рақами – Ҳоланд клублар миқёсидаги 368 ўйинда 300-голини уриши бўлди. Шунингдек, у АПЛда гол урган жамоалар сони энди 24 тага етди – бу «Сити» тарихидаги энг юқори кўрсаткич.
Доннарумма эса иккинчи бўлимда ҳам қаҳрамонлик кўрсатишда давом этди ва яқин масофадан йўлланган зарбани (бу вазиятда ҳам Ҳусанов хатога йўл қўйганди) юзи билан тўсиб қолди. Якунда Энцо Мареска шогирдлари кичик ҳисобдаги устунликни сақлаб қолишди ва қаторасига учинчи ғалабадан кейин турнир жадвалида пешқадамга айланиб олишди. Вазият якшанба куни «Арсенал» ва «Челси» ўртасида кечадиган дербидан кейин ўзгариши мумкин – ҳозирда икки жамоада ҳам 6 тадан очко бор.
Испания: «Атлетико»да йирик мағлубият, Обамеянг иккинчи ёшлигини ўтказмоқда
«Атлетико»нинг мавсумдаги илк мағлубияти ўта оғриқли бўлди. «Сан-Мамес»да мадридликлар охирги бор 2013 йил январида бундай йирик ҳисобда ютқазганди, ўшанда билбаоликлар жамоасини Марсело Биелса бошқарарди. Иккинчи бўлим ҳар икки жамоа учун ҳам уникал чиқди. Басклар бунгача ҳеч қачон танаффусдан кейин уч дақиқа ичида икки гол уришга муваффақ бўлмаганди, «матрасчилар» эса бундай оралиқда икки гол ўтказиб юбормаганди.
Барчаси ака-укалар уюштирган гол билан бошланди. Иняки Уилямснинг зарбасидан кейин тўп ҳимоячининг оёғига теккан ҳолда дарвозабон ҳудудида ҳавога кўтарилди, у ерда турган Нико эса тўпни бошда дарвозага йўналтириб юборди. Кейинги ҳужумда эса Роберт Наварро ўз маҳоратини намойиш этди – у тезкор ҳужумни тўпни чап оёғига олган ҳолда бурчакка аниқ зарба йўллаш билан якунлаб қўйди. 90-дақиқада Сансет пойтахтдан келган меҳмонларни узил-кесил таслим қилувчи голни урди. Ёзги трансферлар ойнасининг сўнгги кунигача «Барселона»га кетишидан умид қилиб ўтирган Ҳулиан Алварес эса 59-дақиқада захирадан ўйинга қўшилди, аммо «Атлетико» ўйинини кучайтира олмади.
«Вилярреал» ўтган мавсум охирида кўп йиллик мураббийи Марселино Торал билан хайрлашганди: томонлар янги шартнома ҳамда клубни ривожлантириш бўйича қатор масалаларда келиша олмаганди. Шундан кейин жамоа бошқарувига Иниго Перес тайинланди, аммо баҳорда «Райо Валекано»ни Конференциялар лигаси финалига олиб чиққан ушбу мутахассиснинг ишлари жойида эмас. Мавсум стартидаги учта сафар ўйинида атиги икки очко қўлга киритилганди. Мухлислар ўз стадионида ниҳоят ғалаба қозонишидан умид қилаётганди ва барчаси яхши бошланганди. Пепе тўпни олдинга чиқиб келган дарвозабон устидан ошириб ташлаган ҳолда ҳисобни очди. Аммо биринчи бўлим охирида «Депортиво» ҳисобни тенглаштирди, ла-коруняликларнинг янги кумирига айланган Обамеянг ушбу голга ҳаммуаллифлик қилди.
Иккинчи бўлим ҳам «Вилярреал»нинг ҳужумлари билан бошланди. Аммо мезбонлар кўплаб вазиятлардан фойдалана олмади ва ўйин дурангга қараб кета бошлади. Фақат меҳмонлар сафида Адама Траоре автогол уриб қўйганидан кейингина мухлислар енгил тин олишди. Аммо барчаси ҳали олдинда эди. Уч дақиқа ўтиб дарвозабон Луиз Жуниор қўпол хатога йўл қўйди ва яқин бурчагидан гол олиб чиқди. Ўйиннинг сўнгги дақиқалари ўтаётганида эса Обамеянг ҳимоячилардан қочиб кетиб, навбатдаги голини урди. Габонлик ушбу 37 ёшли ҳужумчи Ла лигани забт этмоқда. У XXI асрда янги жамоаси сафидаги тўрт ўйинда ҳам гол ёки ассист муаллифи бўлган энг катта ёшли футболчига айланди. Унинг саъй-ҳаракатлари билан ла лига дебютанти бўлган «Депор» 8 очко тўплаган ҳолда 4-ўринда бормоқда, «Вилярреал» икки очкоси билан 16-ўринда.
«Боруссия» Зинсҳаймда жуда оғир ўйин ўтказди. Кобел жамоани бир неча бор қутқарди, биринчи бўлим давомида Мане жароҳат олди. «Ҳоффенҳайм» эса танаффус арафасида ҳақли равишда ҳисобни очди. Иккинчи бўлим бошлангач, вазият янада оғирлашди: мезбонлар дастлаб ўта қулай вазиятни қўлдан чиқарди, аммо бироз ўтиб марказий зонадаги тўп йўқотилишидан кейин дортмундликлар иккинчи голни ҳам ўтказиб юборишди.
Дортмундда бу ўйинни қутқариб қолиш учун ҳеч қандай имконият йўқдек кўринганди, аммо меҳмонлар беш дақиқа ичида икки гол уриб, мувозанатни тиклашди. Барчаси Антон тўпни эгаллаб олиб, дарвозабон билан яккама-якка вазиятга чиқиб кетган Гирассини голли узатма билан таъминлашидан бошланди. Кейин эса Кобел ушбу ҳужумчини олдинга бошлади. Тўпга етиб борган Гирасси ҳисобни тенглаштирувчи голни урган Фабиу Силвага ассистентлик қилди. Ўйин охирида эса Нико Ковач мезбонлар футболчисининг автоголи эвазига сафардан уч очко билан қайтадиган бўлди.
Дастлабки икки турдаги асосий сенсация – «Бавария» Гелзенкирҳенда голсиз дуранг қайд этиши бўлди. Бундеслигага қайтган «Шалке» бу дурангни ғалабадек нишонлади, буни тўғри тушуниш мумкин: ушбу жамоа 2017 йилдан буён мюнхенликлар билан ўйинларда бирорта ҳам очко қўлга кирита олмаётганди. Мезбонлар жонбозлик ва интизом билан ўйнашди, ўйин қаҳрамони эса Кариус бўлди. Ушбу дарвозабон 87-дақиқада Кейннинг тўққизликка йўллаган зарбасини қайтариб, ҳал қилувчи сейвни амалга оширди. Табиийки, бу мезбонлар дарвозаси қаршисидаги ягона голли вазият эмасди, ўйин давомида Браун ва Диас ҳам жуда қулай имкониятларга эга бўлишганди. Аммо шу куни ҳеч кимга гол уриш насиб этмади.
