Португалиядан Анголага учиб кетаётган самолёт юкчининг йўқолиб қолгани ҳақидаги хабардан кейин Лиссабонда фавқулодда қўнишни амалга оширди. Бу ҳақда 2 октябрда Associated Press ахборот агентлиги хабар берди.
Лиссабон аэропортининг расмий вакили Руи Оливейра журналистларга Angola Airlines авиакомпанияси самолёти 1 октябрда маҳаллий вақт билан соат 10:00 да учиб кетганини маълум қилган. Самолёт Портодан Луандуга учиб кетаётган бўлган. Самолёт ҳавога кўтарилгандан тахминан бир соатдан кейин Портода юкчилардан бири йўқолиб қолгани аниқлангач фавқулодда қўнишга мажбур бўлган.
Самолёт қўнгач, эркак юк бўлимида совқотган ҳолатда тирик топилган. Маълум қилинишича, юкчи шифохонага олиб кетилган. Айни вақтда унинг ҳолати барқарор дея баҳоланмоқда.
