Америкадаги JetZero стартапи йўловчи авиациясида янги босқич бўлиши мумкин бўлган Z4 авиалайнерини ишлаб чиқишни давом эттирмоқда. Лойиҳа 20–24 июл кунлари Буюк Британиянинг Ҳэмпшир графлигида ўтказилган Farnborough International Airshow халқаро авиасалонида тақдим этилди.

Янги самолётга биринчи бўлиб Баҳрайн миллий авиакомпанияси Gulf Air қизиқиш билдирди. Бу JetZero учун нафақат Яқин Шарқдаги биринчи буюртмачи, балки АҚШдан ташқаридаги илк ҳамкор ҳам ҳисобланади.

Шунингдек, Япониянинг Japan Airlines (JAL) авиакомпанияси ҳам лойиҳанинг дастлабки ҳамкорларидан бирига айланди. Ҳамкорлик доирасида JAL мутахассислари самолётни амалдаги парвозларга мослаштириш ишларида иштирок этади. Улар салоннинг тижорий жойлашувини такомиллаштириш, эксплуатация тартибларини ишлаб чиқиш, аэропортларда телетраплар ва тўхташ жойларида самолётнинг ишлашини баҳолаш, ерда хизмат кўрсатиш ҳамда техник хизмат ва таъмирлаш тизимини шакллантириш бўйича ўз тажрибасини тақдим этади.

Калифорнияда жойлашган JetZero компанияси ишлаб чиқаётган Z4 авиалайнери 2030-йиллар бошида тижорат парвозларини бошлаши режалаштирилган.

Самолёт тахминан 250 нафар йўловчига мўлжалланган бўлиб, бир марта ёнилғи қуйиш билан 9 260 километргача парвоз қила олади. Ишлаб чиқувчиларнинг ҳисоб-китобларига кўра, янги аэродинамик ечим туфайли ёнилғи сарфи мавжуд самолётларга нисбатан 30–50 фоизгача камаяди.

Z4 моделида фюзеляж ва қанотлар ягона кўтарувчи юза сифатида лойиҳалаштирилган. Бу конструкция самолётнинг деярли бутун кенглиги бўйлаб кўтарувчи куч ҳосил қилиб, ҳаво қаршилигини сезиларли даражада камайтиради. Шу билан бирга, янги самолёт мавжуд аэропорт инфратузилмасини ўзгартиришни талаб қилмайди.

Компания маълум қилишича, Z4 стандарт телетраплар ва рулёж йўлакларидан фойдалана олади. Кенг фюзеляж эса йўловчиларни тезроқ чиқариш ва чиқишини таъминлайди, шунингдек, салонни ҳам йўловчилар, ҳам экипаж учун анча кенг ва қулай қилади.

Мутахассислар фикрича, агар лойиҳа муваффақиятли якунланса, Z4 сўнгги ўн йилликларда фуқаро авиациясидаги энг муҳим технологик ютуқлардан бирига айланиши ва узоқ масофали авиақатновларни янада тежамкор ҳамда экологик жиҳатдан самарали қилишга хизмат қилиши мумкин.