Самолётни таъмирлаш куз охиригача якунланиши айтилмоқда. Аммо таъмир нималарни ўз ичига олиши номаълум. CNN телеканалининг хабар беришича, Трамп шу ой бошида Туркияга самолётда боришидан олдин, расмийлар президентнинг Эрон билан бир неча ой давом этган уруш пайтида ўзи учун юқори хавф туғдириши мумкин бўлган ҳудудларга, хусусан, Исроил томонга янги таъмирланган самолётда саёҳат қилмаслиги кераклигини таъкидлаган.
Лекин шунга қарамай Трамп юқори лавозимли амалдорлари самолётни хавфсиз деб баҳолагани сабаб Туркияга учиришга қарор қилган. Кейинчалик эса ўша амалдорлар бу хато бўлганини тан олган ҳамда хавфсизлик баҳосини тезда ўзгартирган.
Трампга кўра, максимал даражада тез муддатда бу самолёт хавфсизлик нуқтайи назаридан такомиллаштирилади. Президент ҳаво кемаси бутунлай алмашишини айтмаган, лекин шундай бўлиши ҳам мумкин. Трампнинг қўшимча қилишича, режалаштирилган ўзгаришларни амалга ошириш учун “тахминан бир ой вақт кетади” — мутахассисларнинг таъкидлашича эса бу муддат сезиларли яхшиланишларни амалга ошириш учун умуман етарли эмас.
Трамп Туркияни тарк этганида, янги самолёт ўрнига эски президентлик самолётини танлади, бу эса унинг хавфсизлик камчиликларини текширишга туртки бўлди. Трамп ўша пайтдаги борт алмашинуви хавфсизлик чораларининг йўқлиги сабабли эмас, балки Буюк Британия авиабазасидаги АҚШ ҳарбий хизматчилари самолётни кўришлари учун қилинганини айтган. Аммо АҚШ матбуотига кўра, бу икки самолёт халқаро миқёсда президентнинг хавфсизлигини таъминлаш учун бир хил имкониятларга эга эмас.
Кейинчалик самолёт билан боғлиқ хавфсизлик муаммолари ҳақидаги хабарлар президентни ғазаблантирган ва бу масала бўйича биринчи бўлиб хабар берган New York Times мухбирларига чақирув юборилган.
Душанба куни Оқ уй матбуот котиби Керолайн Левитт янги самолёт “мутлақо хавфсиз” эканини таъкидлади, аммо у кўпроқ таъмирланиши кераклигини ҳам айтди.
“Янги Air Force One самолёти президентнинг саёҳатлари учун мутлақо хавфсиз, аммо кузда қўшимча янгиланишлар ва такомиллаштиришларга эга бўлади, бу эса тахминан бир ой давом этади”, деди Левитт ўз баёнотида.
Трамп янгиланишлардан олдин самолётдан ички саёҳатлар учун, ҳатто халқаро саёҳатлар учун ҳам бир неча марта фойдаланиши кутилмоқда. Бироқ фақат хавфсиз зоналарга училади. Масалан, Трамп сентябр ойида Ирландияга ҳозирги самолётида бориши кутилмоқда.
Трамп шунингдек, Хитой раҳбари Си Жинпинг билан учрашув ҳақидаги музокаралар ортидан шу йил охирида янги самолётини Хитойга олиб бориши мумкинлигини ҳам айтди.
AeroDynamic Advisory компаниясининг бошқарувчи директори Ричард Абулафиа CNN телеканалига берган интервюсида самолётда 1 ойлик қисқа вақт ичида ҳеч қандай сезиларли яхшиланиш бўлмаслигини айтди.
Вашингтон, АҚШдан Kun.uz учун махсус тайёрланди.
