Пауэрлифтинг ва оғир атлетика бўйича Узоқ Шарқ чемпиони Иван Савкин 288 тонналик электровозни тортишнинг уддасидан чиқди, деб хабар қилмоқда «Интерфакс» агентлиги.
«Об-ҳаво панд берди. Иккинчи уринишдан сўнг электровоз 1,1 метрга тортилди. Совуқда қуюқлашиб қолган мой ҳам қўшимча юк бўлди», — деган Савкин.
Акция Приморьедаги Смоляниново қўрғонида бўлиб ўтган. Спортчи видеолавҳани Гиннесс рекордлари китоби раҳбариятига юборишни режалаштирган.
32 ёшли пауэрлифтер шу вақтгача кўп тонналик паром, аэробус, тепловоз, зенит-ракета комплекси, прицепли ҳарбий тягач, Т-34 ва Т-54Б танкларини жойидан силжитишнинг уддасидан чиққан.