Қишнинг сўнгги ҳафтаси воқеаларга бой бўлди. Қисқа муддатли инқироздан сўнг «Барселона» яна ўзига кела бошлади. «Реал» ажойиб камбэк эвазига, катта қийинчиликлар билан бўлсада, ғалаба қозонди, «МЮ» Ибраҳимовичнинг хатти-ҳаракатлари натижаси ўлароқ навбатдаги совринни қўлга киритди. Tribuna.Uz уик-энди шу каби барча ёрқин лаҳзаларини эслаб ўтади.
Ўзига келаётган «Барселона» ва характер кўрсатган «Реал»
«ПСЖ»дан қабул қилиб олинган мағлубиятдан кейин ўзига кела олмаётган «Барселона» ниҳоят ҳафта охирида бурилиш учун сабаб бўла оладиган муҳим ғалабани қўлга киритди. «Атлетико» меҳмони бўлган каталонияликлар кетма-кет 10-учрашувда, Испаниядаги ички мусобақаларда мағлубиятга учрамади.
Аммо «Реал» ҳам қараб тургани йўқ. Жамоа «Вильярреал» уйида 0:2 ҳисобда ортда бора туриб, охир-оқибат ғалаба қозониб кетди. Албатта иккинчи гол катта саволларни юзага келтириб чиқарди. Кўпчилик бу вазиятда ҳакам нотўғри пенальти белгиланини гапирди. Аммо Роналду бу вазиятга эътибор қаратмади ва пенальтидан навбатдаги голини киритиб, ўзига хос ва мос бўлган рекордни ўрнатди.
