Венгер мураббийликдан кетишини ўлимга тенг деб атади

«Арсенал» жамоаси бош мураббийи Арсен Венгер мураббийлик фаолиятини давом эттиришини маълум қилди.

«Мен фаолиятимни тугатмоқчи эмасман, бу ёшлар учун. Мен каби кекса кишилар учун касбни ташлаш ўлимга тенг.

Шубҳасиз, мен клубга янги келган вақтимдаги каби ғалабаларга чанқоқман. Ҳозирда йигирма йил аввалгига қараганда кучлироқ босимни ҳис қилмоқдаман, аммо ҳамон ғалаба қозонишни истайман.

Ўша вақтдаги «Арсенал» билан ҳозиргисини таққослаш мумкин. Йигирма йил аввал клубда 70 киши ишлар эди, ҳозир эса 700 нафар ходим. «Арсенал»нинг бир дона акцияси ўшанда 400 фунт турар эди, ҳозир - 18 000», - деган Венгер The Telegraph мухбирига.

Эслатиб ўтамиз, Венгернинг шартномаси ёзда ниҳоясига етади, франциялик мутахассис ҳозирча келажак бўйича аниқ қарор қабул қилмаган.