Эрдўған Туркиядаги ислоҳотлар уни диктаторга айлантирмаслигини айтди

Туркия президенти Ражаб Тоййиб Эрдўған CNN телеканалига берган интервьюсида Туркияда ислоҳотлар ўтказилиши уни диктаторга айлантирмаслигини айтди.   

Туркияда ҳокимиятнинг парламентар бошқарувидан президентлик бошқарувига ўтиш бўйича 16 апрелда ўтган конституциявий референдум бу ўзгаришлар тарафдорларининг кичик устунлиги билан якунланди. Дастлабки маълумотларга кўра, ушбу ислоҳотлар учун 51,4 фоиз сайловчи овоз берган. 

Эрдўған у референдумни мамлакатдаги сиёсий тизимни тузатиш учун эмас, балки ўз ҳуқуқ ва имкониятларини ошириш мақсадида ўтказгани ҳақидаги айбловларни инкор этди.  

"Янги тизим – ўзгариш, Туркия тарихида демократиянинг ўзгача тус олишидир", деб айтган Эрдўған ва шу тариқа "ислоҳотлар – диктатурага қадам" деган гапларни инкор этган. Унинг айтишича, "диктатура бор жойда, президентлик бошқаруви тизимига ҳожат йўқ".

"Мен ҳам бир ожиз бандаман ва исталган вақтда вафот этишим мумкин", деб айтган Эрдўған. 

Референдумнинг якуний натижалари шикоятлар кўриб чиқилгандан сўнг, 11-12 кундан кейин маълум қилинади. Мухолифат референдум натижаларини бекор қилишни талаб қилган. Бунга эса жумладан, Туркия сайлов комиссиясининг печать урилмаган бюллетень ва конвертларни ҳақиқий деб ҳисоблаш қарорининг ноқонунийлиги сабаб қилиб кўрсатилган.