«Бавария» анъанани давом эттирди: Бундеслиганинг ёш юлдузи сафига қўшиб олинди

«Бавария» «Вердер»дан Серж Гнабри сотиб олингани ҳақида расман эълон қилди.

21 ёшли германиялик бу футболчи мюнхенликлар жамоаси билан 3 йиллик шартнома тузган.

Bild маълумотига кўра, трансфер қиймати 8 миллион еврони ташкил этган.

Бундан олдинроқ «Вердер» Гнабрини «Ҳоффенхайм»га трансфер қилиши ҳақида маълум қилинганди. Аммо музокараларга «Бавария» қўшилгач, бу трансфер барбод бўлган.

Гнабри «Вердер»га 2016 йилнинг 31 августида «Арсенал» сафида 5 миллион фунт эвазига келиб қўшилганди. У бундеслиганинг якунланган мавсумида 27 ўйинда майдонга тушиб, 11 гол урди ва икки голга узатма берди.

Гнабри Германия терма жамоасига ҳам номзод ҳисобланади. У Германия U21 таркибида шу йилнинг 16-30 июнь кунларида Польшада бўлиб ўтадиган Европа чемпионатида иштирок этади.