64 нафар абитуриент ҳали тест жавоби чиқмасиданоқ талаба бўлишга улгурди 

Шунингдек, қишлоқ хўжалиги йўналишидан ташқари бошқа айрим ОТМларда ҳам худди шундай ҳолатларни кузатиш мумкин.

Хусусан, “Олий ҳамширалик иши” йўналиши рус гуруҳларида Тошкент педиатрия тиббиёт институтининг Сурхондарё учун ҳамда Тошкент тиббиёт академиясининг Наманган вилояти учун ажратилган мақсадли қабул квоталарида ҳам конкурс 1 га тенг. Энг қизиғи Тошкент тиббиёт академиясининг “Олий ҳамширалик иши” йўналиши рус гуруҳида Фарғона вилояти учун 2 та давлат грантига ўрин ажратилган бўлиб, унга атиги 1 нафар абитуриент ҳужжат топширган. Конкурс 1 га эмас, яримга тенг.

Ўзбекистон давлат жисмоний тарбия институти “Спорт фаолияти: эшкак эшиш” йўналишида жами 10 та ўрин (2 та грант, 8 та контракт) ажратилган бўлиб, унга жами 10 нафар абитуриент ҳужжат топширган. Бу дегани улар орасидан 2 нафари бюджетга, қолгани контрактга чиптани нақд қилиб қўйишди. Худди шу институтнинг “Спорт фаолияти: хотин-қизлар спортини ривожлантириш” йўналиши бўйича йўналишининг рус тили гуруҳларида Қорақалпоғистон, Жиззах, Сурхондарё ҳудулари учун тақсимланган квоталарда ҳам ҳудди шундай ҳолат, яъни, конкурс бирга тенг. Ҳаттоки “Спорт фаолияти: хотин-қизлар спортини ривожлантириш” йўналиши бўйича рус гуруҳига Самарқанд вилоятига 4 та ўрин ажратилган (2 та грант, 2 та контракт) бўлиб, унга бор-йўғи 3 нафар абитуриент ҳужжат топширган.

Қолган олийгоҳлардан фарқли ўлароқ, яъни мақсадли қабул белгиланмаган Миллий рассомлик ва дизайн институтининг “Рангтасвир: мультфильм ва компьютер мултипликацияси” йўналишида ҳам 3 та бахтли абитуриентни кўриш мумкин. Ушбу йўналишнинг рус гуруҳида 3 та квота (1 та грант, 2 та контракт) учун 3 тагина абитуриент “кураш олиб боришади”. Фақат уларнинг “кураши” 1 та грант ўрнига бўлади холос. Контракт эса нақд.

Ҳисоб-китоблар шуни кўрсатдики, жами 64 нафар абитуриент ҳали тест жавоби чиқмасиданоқ талаба бўлишга улгурган. Уларнинг 49 нафари давлат гранти асосида, 15 нафари тўлов-контракт асосида ўқишга киришга улгурган. 

Кейинчалик Xushnudbek.uz сайти давлат тест маркази вакили билан шу масала юзасидан суҳбатлашди. Унинг маълум қилишича, 68 баллдан (максимал баллнинг 30%и) кам тўплаган абитуриентлар квота доирасида бошқа рақобатчиси бўлмаса ҳам, талабаликка қабул қилинмас экан. Авваллари, яъни тестдаги жавоб вариантлари 5 та бўлган пайтда минимум балл 56 қилиб белгиланган экан, кейинчалик 4 та вариантли тест тизимига ўтилгач, ушбу чизиқ 68 балл қилиб белгиланибди. Бундай қоида биронта раҳбарий Низомларда белгиланмаган. Бироқ ҳар йили Давлат комиссиясининг баённомаси билан шундай минимум чизиқ тасдиқланар экан.

Эътиборли жойи, Давлат комиссиясининг қарорлари “хизмат доирасида фойдаланиш учун” мақомида бўлади ва ҳеч қаерда эълон қилинмайди (айрим иловаларни ҳисобга олмаганда).