Ўзбекистон миллий терма жамоаси бугун, 31 август куни ЖЧ–2018 турнирига саралаш босқичи “А” гуруҳи 9-турида Хитой терма жамоаси билан сафарда баҳс олиб боради. ЎФФ матбуот хизмати жамоалар ўртасидаги ўзаро баҳслар ва йўқотишлар ҳақида тўхталиб ўтади.
Хитой – Ўзбекистон учрашуви бугун, 31 август куни Ухань шаҳридаги Wuhan Sports Center стадионида бўлиб ўтади. Беллашув Тошкент вақти билан 17:00 да старт олади. “Спорт ТВ” телеканали ушбу ўйинни жонли эфирда узатишни режалаштирган.
Ўзаро учрашувлар
Жамоалар шу кунгача 11 марта ўзаро тўқнаш келган. 6 учрашувда Ўзбекистон, 4 ўйинда Хитой ғалаба қозонган бўлса, 1 қарама-қаршиликда ғолиб номи аниқланмаган. ЖЧ–2018 саралаш босқичи биринчи даврасида Самвел Бабаян шогирдлари Хитойни 2:0 ҳисобида мағлубиятга учратган эди.
Қуйида жамоалар ўртасидаги сўнгги 5 ўйинда қайд этилган натижалар билан танишинг.
16.01.2011 Хитой – Ўзбекистон 2:2 | Осиё Кубоги, гуруҳ босқичи
05.06.2011 Хитой – Ўзбекистон 1:0 | Ўртоқлик учрашуви
06.06.2013 Хитой – Ўзбекистон 1:2 | Ўртоқлик учрашуви
14.01.2015 Хитой – Ўзбекистон 2:1 | Осиё Кубоги, гуруҳ босқичи
11.10.2016 Ўзбекистон – Хитой 2:0 | ЖЧ–2018 саралаши
Бўлажак ўйинга тайёргарлик
Ўзбекистон миллий терма жамоаси ЖЧ–2018 саралаш босқичи охирги икки баҳси олдидан Тошкентда Қирғизистон термасига қарши назорат ўйини ўтказиб, 5:0 ҳисобида ғалаба қозонди.
Бош мураббий ихтиёридаги барча футболчилар имкониятини синовдан ўтказиб, Хитойга 24 футболчидан иборат таркибни танлаб олди.
