WADA vs Хитой. Мамлакатда йирик миқёсда допинг тизими бўлганми?

Бутунжаҳон допингга қарши кураш агентлиги (WADA) ARD телеканалининг кенг кўламли допинг тизими тўғрисидаги навбатдаги фильмига муносабат билдирди. Бу сафар агентлик Хитойда допингни оммавий қўллаш бўйича суриштирув бошлангани ҳақида маълум қилди.

Шу билан бирга, WADA’дан аниқлик киритишларича, допингга қарши агентлик 1999 йилда ташкил этилган, шунинг учун ARD телеканали фильмида сўз юритилган давр – 1980 ва 1990-йилларда Хитой термаларидаги допингга ҳеч қандай реакция билдира олмаган бўларди. Бироқ эндиликда агентлик шифокор Ксю Инсянь томонидан айтилган барча нарсани текшириш мақсадида маълумотлар тўплаш ниятида.

Кеча Хитой олимпия терма жамоаларининг собиқ шифокори Ксю Инсянь журналист Хайо Зеппельтнинг навбатдаги можароли фильмида ХХР миллий жамоалари барча аъзолари 1980 ва 1990-йилларда допинг қабул қилганини айтиб ўтди. Унинг сўзларига кўра, уни қабул қилган спортчилардан энг кичигининг ёши 11да бўлган.

Инсяннинг айтишича, Хитойда допингнинг давлат тизими бўлган. «Бу тизимга 10 мингдан ортиқ одам жалб этилганди. Ўша вақтларда хитойликлар халқаро мусобақаларда ютиб олган барча медалларни олиб қўйиш лозим», - дея Ксю Инсяннинг сўзларини келтиради Deutsche Welle ARD телеканалига асосан.

Шифокорнинг сўзларига кўра, Хитой терма жамоалари спортнинг барча турида допингдан фойдаланган. Допингни футбол, волейбол, баскетбол жамоалари, стол тенниси, бадминтон, енгил атлетика, сузиш, гимнастика ва спортнинг бошқа турлари бўйича термалар қўллаган. «Агарда сен допинг қабул қилишдан бош тортсанг, у ҳолда кетишинг лозим бўларди. Допинг ҳаттоки ўсмирлар терма жамоаларида ҳам қўлланган», - деган Ксю Инсянь.

Шифокорнинг ўзи Хитой олимпия термасидан 1988 йилги Ўйинлар вақтида ишдан бўшатилган. Унинг сўзларига кўра, бу у терма жамоа аъзоларидан бирига допинг беришдан бош тортганидан сўнг юз берган.