Россия президенти Владимир Путин телефон орқали Саудия Арабистони қироли Салмон бин Абдулазиз Ол Сауд билан Суриядаги вазиятни муҳокама қилди. Бу ҳақда Кремль матбуот хизмати маълум қилди.
“Яқин Шарқдаги вазият бўйича фикрлар алмашилди. Сурияда террорчилик гуруҳларига қарши курашдаги муваффақият билан боғлиқ ҳолда ихтилофни ҳал қилиш истиқболларига тааллуқли масалалар кўриб чиқилди”, дейилган хабарда.
Путин мулоқот чоғида Сочида ўтиши керак бўлган Сурия миллий мулоқоти конгресси Сурия муаммосини ҳал қилиш жараёни ва Сурияаро алоқаларга янги туртки беришини таъкидлаб ўтди. Путин Сурия мухолифатининг Ар-Риёдда 22-24 ноябрда ўтадиган учрашуви ҳам шу йўлда хизмат қилишига умид билдирди.
Путин Саудия қиролини Сурия президенти Башар Асад билан музокаралари натижаларидан хабардор қилди ва унга 22 ноябрда Россия, Эрон ва Туркия саммитида кўриладиган масалалар ҳақида сўзлаб берди.
