Kruz.uz сайти ходимлари Қораўзак туманига ташриф буюриб, туман ҳокими Даулетбай Утемуратов билан суҳбатлашди. Ҳоким инвесторларни жалб қилиш учун нималар қилинаётгани ҳақидаги саволга қуйидагича жавоб қайтарди:
«Ҳурматли президентимизнинг Қорақалпоғистонга ташрифи чоғида белгилаб берган топшириқлари асосида, бизлар январ ойи охирларида чет давлатларга бориб, у ердаги инвесторларни жалб қилиш ҳақида режалаштиряпмиз. Шахсан ўзим Вьетнам мамлакатига бориб, у ерда шоличилик, балиқчилик ва ўрдакчилик бўйича ўрганиб келмоқчиман. Албатта у ерга боргандан сўнг қуруқ қайтмаслигимиз керак. Вьетнамдаги инвесторларни қизиқтириб, ўзимизнинг туманимизга олиб келишимиз лозим”.
Ўтган йили туманда инвесторларни жалб қилиш бўйича амалга оширилган ишлар ҳақида Д.Утемуратов қуйидагиларни маълум қилган:
"Қораўзак туманида 2017 йилда 43 млрд. 809 млн. сўмлик инвестициялар жалб қилинди. Туманимизда ўтган йили ижтимоий-иқдисодий комплекс ривожлантириш дастурига киритилган 95 та лойиҳа ишга туширилди. Жалб қилинган 43 млрд. 809 млн. сўмлик инвестициянинг 20 млрд 803 млн сўми лойиҳа ташаббускорлари маблағи, 23 млрд 6 млн сўми эса тижорат банклари кредитлари ҳисобланади. Ушбу лойиҳаларнинг ишга туширилиши туфайли 635 та янги иш ўрни очилди. Булар шунчаки сонлар эмас, реал амалга оширилган ишлардир", дея таъкидлаб ўтган ҳоким.
