Трамп «руслар билан банд бўлган» ФҚБни жиддий айблади

АҚШ Президенти Дональд Трамп маълум қилдики, Федерал қидирув бюроси (ФҚБ) «Россиянинг сайловларга аралашуви» билан шу қадар банд бўлмоқдаки, бунинг оқибатида Флоридадаги фожианинг олди олинмай қолди.

«Афсус, ФҚБ Флоридада шундай хунрезликка тайёргарлик кўрилаётгани ҳақидаги огоҳлантиришларга эътиборсизлик билан қараган. Ахир бунга йўл қўйиб бўлмасди»,— деб ёзган Трамп Twitter саҳифасида

«Улар (бюро ходимлари.— таҳр) Россиянинг Трамп кампанияси билан алоқаларини жуда узоқ текширишмоқда. Ҳолбуки, ҳеч қандай гап йўқ.»,— дея қайд этган у.

«Ўз ишингиз билан машғул бўлинг ва бизни мағрурлантиринг!» — дея фикрларини якунлаган америкаликлар президенти.

Эслатиб ўтамиз, 14 февраль куни АҚШнинг Паркленд шаҳридаги (Флорида штати) Marjory Stoneman Douglas мактабида собиқ ўқувчи отишма уюштирди, оқибатда 17 киши ҳалок бўлди. Ушбу 19 ёшли жиноятчи воқеа жойидан қочиб кетишга уринганида қўлга олинди.

ФҚБ ходимлари олдинроқ Паркленд шаҳридаги мактабда 17 кишининг умрига зомин бўлган Николас Круз жамият учун хавфли эканлиги ҳақидаги огоҳлантиришга эътибор бермаганини тан олганди.

Маълум бўлишича,  жорий йил 5 январида бюрога номаълум шахс қўнғироқ қилади ва Круз ижтимоий тармоқларда кишини  хавотирга солувчи ёзувлар қолдираётгани, мактабда отишма уюштириши мумкинлиги ҳақида хабар беради.

Флорида штати губернатори Рик Скотт Федерал қидирув бюроси (ФҚБ) директори Кристофер Рей истеъфосини талаб қилди.

«Қотилга қарши ФҚБ чора кўришни уддалай олмаганига чидаб бўлмайди. Хатонинг тан олингани муаммонинг ечими эмас. ФҚБ директори истеъфо бериши лозим», — деганди губернатор.