Россия энергия захираларининг дунёдаги энг йирик экспортчиси ҳамда нефть ва газ ишлаб чиқарувчи иккинчи давлат бўлиб қолади. Россия кунига 9 млн баррель нефть ва 36 млрд кубметр газ экспорт қилади. Бу ҳақда British Petroleum компаниясининг “Дунё энергетикасининг 2040 йилгача ривожланиш прогнози” деб номланган баёнотида айтилган. Россия жаҳондаги нефть ва газ ишлаб чиқарилиши ҳажмининг 14 фоизини таъминлайди.
Россия 2040 йилга келиб суюқ углеводородлар қазиб олиш бўйича АҚШ ва Саудия Арабистонига етакчиликни бой беради. 2017 йилда Россия бу борада 1-ўринда, Саудия Арабистони 2-ўринда ва АҚШ 3-ўринда бўлган. Таъкидланишича, Россия 2040 йилда кунига 13 млн баррель нефть олади, ҳозирда бу кўрсаткич 10,9 баррелни ташкил қилади.
Россия 2040 йилга келиб газ олиш бўйича АҚШдан кейин 2-ўринни эгаллайди. Бунда АҚШнинг дунё бўйича газ олиш ҳажмидаги улуши 24 фоизни, Россияники 14 фоизни ташкил қилади. Россия компаниялари газ ишлаб чиқаришни кунига 72 млрд кубметрга етказа олишади.
Умуман олганда нефтга талаб кўрилаётган давр давомида ошиб боради, бироқ унинг охирига келиб барқарорлашади. Талаб асосан ривожланаётган давлатлар ҳисобига тўғри келади.
Табиий газга талаб тез ривожланаётган давлатларда энергияга талабнинг ошиши ва жадаллашиб бораётган саноат сабабли тез суръатлар билан ошиб боради.
Тикланувчи энергия манбалари ҳажми 400 фоизга ошади ва уларнинг энергия ишлаб чиқаришдаги улуши 50 фоиздан кўпроқни ташкил қилади.
