АҚШ ва Исроилнинг Эронга қарши уруши давом этар экан, Вашингтон олдида яна бир оғир савол пайдо бўлди. Бу савол икки ҳафтадан буён АҚШ президенти Доналд Трампни қийнаб келмоқда: Саудия Арабистонининг илтимосларига кўниб, АҚШ ҳарбийларига ҳусийлар назоратидаги нишонларга зарба беришни буюриши керакми?
Аммо бу қарор ҳусийларни қўллайдиган Эронга қарши урушда яна бир фронтни очиб юбориши мумкин эди. Трамп эса ўзи бошлаган ва бутун дунё иқтисодиётига зарба бериб келаётган урушни ярим йилдан ортиқ вақтдан бери тугата олмаяпти.
New York Times'нинг ёзишича, Трамп Саудиянинг ҳусийларга қарши курашда ёрдам сўраб қилган мурожаатлари борасида бир неча ҳафта иккиланиб келган.
Валиаҳд шаҳзоданинг қўнғироғи
17 сентябрь, пайшанба куни вазият кескин тус олди. АҚШ маъмурияти расмийларининг нашрга айтишича, Саудия Арабистони валиаҳд шаҳзодаси Муҳаммад бин Салмон президентга қўнғироқ қилди. Қиролликнинг де-факто раҳбари ва Эрон урушида АҚШнинг асосий иттифоқчиси бўлган шаҳзода жадал илгарилаётган ҳусийлар ҳужумини сусайтиришга ёрдам бериш учун Трампдан яна бир бор аралашишни сўраган.
Трамп бундан бир кун олдин маслаҳатчилари билан учрашиб, уларга зарбалар бериш тарафдори эмаслигини айтганди. Аммо валиаҳд шаҳзода билан гаплашгач, фикридан қайтди ва Пентагонга ҳаво зарбаларига тайёргарлик кўришни буюрди.
Бироқ якшанба куни тушга келиб, президент яна фикридан қайтганга ўхшади, деб ёзмоқда Times. Нашр билан гаплашган Оқ уй расмийларига кўра, АҚШ ҳусийларга ҳаво зарбалари бермайди. Ҳеч бўлмаганда ҳозирча. Расмийлар ҳарбий режаларни муҳокама қилишга ваколатлари бўлмагани учун исмларини ошкор қилмаслик шарти билан гапирган.
Оқ уйнинг матбуот хизмати эса Трампнинг қарор қабул қилиш жараёнини расман изоҳлашдан бош тортди. Маъмуриятнинг юқори мартабали расмийларидан бири фақат шундай деди: «АҚШнинг Саудия Арабистони билан мудофаа келишуви бор ва биз доим иттифоқчиларимизни ҳимоя қиламиз».
Сўнгги дақиқаларда ўзгарган қарор
Маъмуриятдаги яна бир юқори лавозимли манбага кўра, президентнинг яқин даврасидагиларнинг аксарияти Саудиянинг ҳусийларга қарши урушига қўшилишга шубҳа билан қараган ёки бунга очиқ қарши чиққан. Бунинг асосий сабаби АҚШ ҳарбийлари Эрон билан урушда аллақачон дуч келаётган зўриқиш эди.
