Нигерияда жангарилар ҳужумидан кейин 46 ўқувчи қиз йўқолди 

Нирегия ҳукумати “Боко Ҳаром” террорчилик гуруҳи жангарилари Йобе штатидаги Дапчи қишлоғига ҳужум қилганидан кейин 46 нафар ўқувчи қиз бедарак йўқолган деб ҳисобланаётганини тасдиқлади. Бу ҳақда “Синьхуа” ахборот агентлиги хабар бермоқда.

Аввалроқ Reuters ахборот агентлиги манбаларга иқтибос келтирган ҳолда, ҳужумдан кейин 90 дан кўпроқ қиз йўқолгани ёки ўғирлаб кетилган бўлиши мумкинлигини маълум қилган.

Кейинроқ йўқолган деб ҳисобланган қолган қизлар жангарилардан яширинганлари маълум бўлган.

Полиция йўқолган қизлар ўғирланганликлари ҳақидаги ахборотни рад этмоқда. “Мен мактаб директоридан “Ўлим ёки қизлар ўғирланган ҳолатлар бўлдими?” деб сўраганимда, у “йўқ” деб жавоб берди”, деб айтган штат полицияси бошлиғи Абдилмалики Сунмону.

2014 йил апрелда жангарилар Чибок шаҳрида 276 ўқувчи қизни ўғирлаб кетишганди. “Боко Ҳаром” етакчиси қизларни ҳибсга олинган жангариларга алмаштиришни таклиф қилган, бироқ ҳукумат бунга рози бўлмаган.

2017 йилда Нигерия ҳукумати ўғирлаб кетилган қизлардан 82 нафарини жангариларга алмашган. 195 қиз расман йўқолган деб ҳисоблаб келинаётганди. 82 қиз тутқунликдан озод қилингандан кейин яна 113 қизнинг тақдири номаълумлигича қолган.