Мессининг акаси яна қамоққа олинди

35 ёшли Матиас Месси автомобиль ҳайдовчиси билан жанжаллашиб қолгани учун маҳаллий полиция томонидан ҳибсга олинди. Жабрланувчининг ишонтиришича, «Барселона» юлдузининг акаси унга қурол билан таҳдид қилган.

24 ёшли ҳайдовчи Жавьер Ривера Матиас Месси билан юзага келган жанжалдан сўнг полицияга мурожаат қилган. Икки эркак кўчада автомобилларининг кичик тўқнашуви сабабидан жанжаллашиб кетишган. Матиас эса ёнидаги тўппонча билан Жавьерга сўзини ўтказишга уринган.

«У нега мени йўлимни кесиб ўтганини билиш учун тўхтагандим. Машинадан тушишим билан, у менга таҳдид қила бошлади. Футболкамни йиртиб юборди. Кейин машинасига қайтди ва қуролини олиб менга ўқталди», деган Ривера.

Воқеа жойидан Матиас қочишга улгурган, бироқ кўп ўтмай авария содир бўлган Аргентинадаги Вилья Хесель шаҳридан унча узоқ бўлмаган ҳудудда у полиция томонидан қўлга олинган.

Daily Mail нашри берган хабарда қайд этилишича, ҳарбийлар унинг машинасидан ҳеч қандай ўқотар қурол топа олишмаган. Аммо салондан наркотик модда топилгани айтилмоқда.

Эслатиб ўтамиз,Матиас Мессининг бу биринчи марта ҳибсга олиниши эмас. 2017 йилнинг декабрида у қайиғида чиққан ноқонуний қуролни сақлаганликда айбланиб полиция томонидан ушланганди. Ўшанда унинг адвокатлари полициянинг ўзи қуролни Матиаснинг қайиғига ташлаб қўйишганини айтиб чиқиш қилганди.