17-марта...
Аргентина миллий жамоасидаги фаолиятини якунлаган Лионел Месси 17-марта «Олтин тўп» учун номзодлар сирасига киритилди. Бунақаси бошқа ҳеч бир футболчи билан содир бўлмаган.
Шунингдек, Месси «Олтин тўп»га энг кўп вақт фарқи билан номзод бўлиб, ўзига хос рекорд ўрнатди. У биринчи марта 2006 йил сочини ўстириб юрадиган, энди-энди ўғилларининг онаси Антонелла билан муносабатларини тиклаган 19 ёшли йигит вақтида дунё футболининг бош соврини учун номзод бўлган. Ўша йили совринни бизнинг Каннаваро ютган.
Орадан 20 йил ўтиб, қарий бошлагани сезилган, катта ўғли мактабни битираётган, соқол қўйган Месси яна «Олтин тўп»ни ютиш учун 30 номзод орасида! Аввалги меҳнатлари учун эмас, охирги мундиалда ҳамон юқори даражада эканини исботлагани, бир ўзи Аргентинани учинчи марта ЖЧ финалигача олиб чиққани учун. Инсон 20 йил давомида жисмоний ҳолатини бундай юқори даражада сақлаб туриши шунчаки ҳавас қиларли.
ЕЧЛми ёки ЖЧ?
Охирги йилларда «Олтин тўп»га муносабат ўзгарди. Масалан, пандемия деб Левандовскийга мукофот топширилмагани катта ноҳақлик бўлганди. Бу йилги номзодларда ҳам тушунмовчилик бор. Масалан, Саудия чемпионатида ўйновчи Хулиан Кинонес ва Садио Мане нега номзодлар орасига киритилгани мутлақо тушунарсиз. «Олтин тўп» авваллари Европа чемпионатларида ўйнайдиган энг яхши футболчига бериларди, кейин дунёнинг энг яхши футболчисига бериладиган бўлди. Барибир Европада ўйнайдиган йигитларга устунлик берилиши керак. Чунки кўҳна қитъа футболи ва Саудия лигаси ўртасида фарқ катта.
Ташкилотчилар мукофот аниқ кимга берилишини аниқлаб олиши керак: ЕЧЛда энг яхши ўйнагангами, ЖЧдами ёки умумий индивидуал ўйинларга қарабми? Тўғрисини айтиш керак, ўтган мавсумда ҳеч бир футболчи бошқалардан яққол ажралиб турмади. ЕЧЛда ПСЖ ғолиб бўлди, мантиқан олиб қараганда, Хвича жамоанинг энг зўри эди. Лекин Луис Энрикенинг мураббийлик маҳорати ҳеч бир футболчининг қаҳрамонлигига ўрин қолдирмади. ЖЧда ҳам шундай бўлди. Испания ҳақида гапирганда, Луис де ла Фуенте номи ҳаммадан юқорида тилга олинди. Месси ва Роналду давридаги каби ҳеч ким саволларга ўрин қолдирмайдиган даражада бўлмади.
Ким муносиб?
Энди «Олтин тўп»га бу йил ким муносиб экани ҳақида шахсий фикримни билдирсам. Асосий масала учлик ва бешликда ким бўлиши. Менимча, кучли бешликда Родри, Мбаппе, Кейн, Месси ва Ямал бўлса керак. Балки иримига ПСЖдан кимнидир қўшишар. Балки Фабиан Руис, балки Дембеле. Кучли учликда жуда зўр евромавсум ўтказган Кейн, Мбаппе ва жаҳон чемпиони бўлган Испания сардори Родри бўлса керак.
