Россия ўз ҳудудидан 60 нафар америкалик дипломатни чиқариб юборади

Россия АҚШ элчихонасининг 58 ходимини ва Екатеринбургдаги консуллигининг 2 ходимини нон грата шахслари деб эълон қилди. Бу ҳақда Россия ташқи ишлар вазирлиги сайтида маълум қилинган.

Улар 5 апрелгача Россияни тарк этишлари керак.

Бундан ташқари, Москва Санкт-Петербургда АҚШнинг бош консуллигини очишга ва унинг фаолият юритишига рухсатни қайтариб олган. АҚШ томони уларга тақдим қилинган бинони икки кун ичида бўшатиб бериши керак.

Шунингдек, АҚШ элчиси Жон Хантсмандан Россия давлат активларининг АҚШда ҳибсга олиниши мумкинлиги ҳақидаги сўзларига изоҳ бериш сўралган.

“АҚШ томони бундай таҳдиднинг амалга оширилиши муносабатларимиз янада тубанлашишига олиб келиши мумкинлигидан огоҳлантирилган. Бу эса глобал барқарорлик учун оғир оқибатларга айланиши мумкин”, дейилган ташқи ишлар вазирлигида.

26 март куни АҚШ Британия фойдасига жосуслик қилган собиқ россиялик разведкачи Сергей Скрипаль ва унинг қизининг заҳарланиши билан боғлиқ ҳолда 60 нафар россиялик дипломатни нон грата шахслари деб эълон қилган ва Россиянинг Сиэтлдаги бош консуллигини ёпишга қарор қилган.