«Сизлар учун хизмат қилиш мен учун катта шараф» - Шерзод Кудбиев ҳоким сифатида бажарган ишлари ҳақида маълумот берди 

12 апрель куни Бандлик ва меҳнат муносабатлари вазирлиги янги раҳбари этиб тайинланган Шерзод Кудбиев Тошкент шаҳар Мирзо Улуғбек тумани ҳокимлигининг Facebook’даги саҳифасида ҳоким сифатида амалга оширган ишларини сарҳисоб қилди. У 2016 йил сентябридан бери Мирзо Улуғбек тумани ҳокими сифатида ишлаб келди.

Ҳокимлик Facebook’да саҳифани очди ва у орқали тумани аҳолиси билан мулоқот қилинди, туманда амалга оширилаётган барча муҳим воқеалар ҳақида маълумот бериб борилди. Жумладан, биринчи маротаба маҳаллий бюджет параметрларини оммавий муҳокама этиш учун эълон қилинди.

Шунингдек, очиқ мулоқотлар ўтказиш учун туман аҳолиси билан мунтазам равишда учрашувлар ташкил этиш амалиёти йўлга қўйилди ва унда туман аҳолиси ўз муаммосини тўғридан-тўғри туман ҳокими билан муҳокама этиш имкониятига эга бўлди.

Бундан ташқари, ҳокимлик фаолияти очиқлигини таъминлаш мақсадида Мирзо Улуғбек ҳокимлиги қошида Жамоатчилик Кенгаши ташкил этилди.

Obod uy лойиҳасини ишга тушириш орқали ХУЖМШ соҳасида ижобий ўзгаришларни амалга оширишга ҳаракат қилинди. 

“Тадбиркорлар ва инвесторлар билан бевосита мулоқотни йўлга қўйишга ҳаракат қилдик;
ўнлаб километр йўллар ва пиёдалар йўлакчаларини асфальтладик;
янгиланган «Экопарк» ва «Гулшан» боғларини ишга туширдик, янги объектлар қурдик ва ҳудудлар барпо этдик;
ногиронлар, ёлғиз, ёрдамга муҳтож бўлган аҳоли қатламига ёрдам бердик;

Умуман олганда, туман ҳокимлиги томонидан ҳар куни амалга оширилиши керак бўлган барча ишларни бажардик”, - дейилади хабарда.

Қайд этилишича, ушбу давр мобайнида туманда 1800 дан зиёд янги тадбиркорлик субъектлари рўйхатга олинди.

Туман бюджетидан жами 291,3 млрд. сўм ажратилди, жумладан:

- ижтимоий соҳа ташкилотларига – 195,1 млрд. сўм;
- бошқарув органлари учун – 15,4 млрд. сўм;
- ободонлаштириш ишларига – 28,1 млрд. сўм;
- соғлиқни сақлаш тизимига – 47,9 млрд. сўм;
- маданият соҳасига – 1,05 млрд. сўм;
- спортни ривожлантириш учун – 3,6 млрд. сўм;
- таъминот сифатида – 13,8 млрд. сўм;
- бино ва иншоотларнинг жорий таъмирига – 9,3 млрд. сўм;
- аҳолининг ижтимоий ҳимояга муҳтож қатлами фарзандларини бепул эмлаш учун – 0,2 млрд. сўм.

Ушбу давр мобайнида туман аҳолисининг 40 мингдан ортиқ мурожаатлари кўриб чиқилди. Бу кунига тахминан 70 та мурожаатни ташкил этади.

“Ишимизда биз доимо шаффофлик, ошкоралик ва очиқлик тамойилларига амал қилдик. Айрим ҳолларда биз бирор ишни қилмаган, кимнидир эшита олмаган, вақтида жавоб бера олмаган бўлишимиз мумкин, аммо буни биз хоҳламаганлигимиз учун эмас, балки вақт ва ресурслар етарли эмаслиги билан изоҳлашимиз мумкин.

Азиз дўстлар, Мирзо Улуғбек туманини янада яхшироқ, яшаш учун қулайроқ, хавфсизроқ қилиш учун биргаликда барча ишларни ташкиллаштирганимиз учун Сизларга чин дилдан миннатдорчилик билдираман. Мен ҳар доим, қаерда бўлишимдан қатъий назар, Мирзо Улуғбек тумани ҳокими лавозимида иш юритган даврларни илиқлик ва самимийлик билан эслайман. Ҳар бирингизга оилавий фаровонлик, сиҳат-саломатлик, барча ишларда муваффақиятлар тилайман.

Сизлар учун хизмат қилиш мен учун катта шараф!” – дея якун ясалган ҳоким хабарига.