Россияда йилнинг 1-чорагида энг оммабоп бўлган машиналар маълум

KIA Rio/Фото: autostat.ru

«Автостат» таҳлил агентлиги экспертлари Россияда 2018 йилнинг январь-март ойларида энг кўп сотилган янги хорижий автомобиллар рейтингини тузиб чиқишди.

Бу рейтингда, худди умумий бозорда бўлгани каби, KIA Rio етакчилик қилмоқда, у жорий йилнинг илк 3 ойи давомида 25 370 маротаба сотилди, бу бир йил аввалги натижадан 20,2 фоизга кўпроқ. Иккинчи ўринга Hyundai Creta кроссовери кўтарилиб олди, унинг савдо ҳажми 39 фоизга ошди (15 764 дона). Учинчи поғонага эса Hyundai Solaris седани 14 470 сотилган машина билан тушиб кетди.

Кучли бешликка Volkswagen Polo (11558; +14,4%) седани ва Renault Duster (10270; +19,4%) кроссовери якун ясаб берган. Улардан ташқари, 2018 йилнинг 1-чораги якунлари бўйича Россия бозори топ-10лигига қуйидаги машиналар кирди: Skoda Rapid (8023; +28,8%), Renault Kaptur (7659; +27,5%), KIA Sportage (7590; +47,5%), Volkswagen Tiguan (7308; +44,8%) ва Renault Sandero (7237; +27,7%).

Шунингдек, таъкидлаб ўтиш жоизки, Россияда жорий йилнинг январь ойидан март ойига қадар янги хорижий машиналар савдоси умумий ҳисобда 294,7 минг донани ташкил этди. Шу тариқа, Россия бозорининг 75 фоизи улар ҳиссасига тўғри келди.