Исроил АҚШ билан Эроннинг махфий ҳарбий-ядровий лойиҳаси ҳақидаги маълумотлар билан бўлишди ва бундан кейин АҚШ президенти Дональд Трамп Эрон билан ядровий битим тақдири ҳақида тўғри қарор қабул қилишига умид билдиради, деб айтди Исроил бош вазири Биньямин Нетаньяху.
“Бу даҳшатли битимдир, уни тузиш керак эмас эди. Бир неча кундан кейин президент Трамп у билан нима қилиш кераклиги борасида қарор қабул қилади. Ишончим комилки, у тўғри қарор қабул қилади. АҚШ, Исроил, бутун дунёда тинчлик бўлиши учун тўғри қарор”, деб айтган Нетаньяху.
У Трампнинг Эрон 2015 йилда 6 та энг “йирик давлатлар” билан тузган битимни қатъийлаштириш ёки ҳамкорлар билан келишиб бўлмаса, бу битимдан АҚШни олиб чиқиш истагини қўллаб-қувватлаган.
Нетаньяху, шунингдек, Эронни ядровий қуроли йўқлиги ҳақида ёлғон сўзлаганликда айблади.
“Эрон етакчилари бир неча марта уларда ядровий қурол борлигини рад этишган. Мен бугун бу ерда сизга бир нарсани айтгани турибман: Эрон ёлғон сўзлаган”, деб айтган Исроил бош вазири.
Нетаньяху маҳаллий телевидениенинг жонли эфирида иврит ва инглиз тилларида Исроил қўлига Эрон ядровий дастурининг “Омад лойиҳаси” деб шартли номланган махфий қисми бўлганини исботловчи ярим тонналик архив – юз минглаб ёзма ва рақамли ҳужжатлар тушганини айтган.
Нетаньяху Исроил разведка томонидан бир неча ҳафта олдин қўлга киритилган ушбу маълумотларни АҚШга тақдим қилганини айтган.
