Хитойда 27 млн доллар пора олишда айбланган амалдор умрбод озодликдан маҳрум этилди

Хитойнинг Тяньцзинь шаҳри халқ суди 8 май куни Хитой компартиясининг марказий қўмитаси сиёсий бюросининг собиқ аъзоси Сунь Чжэнцайни коррупция иши бўйича умрбод қамоқ жазосига маҳкум қилди.

Ҳукм ўқиб эшиттирилгандан кейин Сунь Чжэнцай сўнги сўзида айбини тўлиқ тан олиб, қилган ишидан пушаймонлигини айтган. У, шунингдек, ҳукм адолатли чиқарилганини ва у бўйича арз қилмаслигини айтган. Суд қарорига кўра, судланувчининг барча мол-мулки мусодара қилинади ва у барча сиёсий ҳуқуқлардан маҳрум этилади. 

Хитойнинг олий халқ прокуратураси 2017 йил декабрида Чжэнцайни коррупцияда гумон қилиб, унга қарши тергов бошлаган. Тергов маълумотларига кўра, собиқ амалдор умумий ҳисобда 170 млн юан (27 млн доллар) пора олган.  

Собиқ амалдор шахсий фойда олиш ва турли давлат ҳамда партиявий лавозимларни эгаллаган учинчи шахслар манфаати йўлида хизмат ваколатларини суистеъмол қилишда айбланган.