«Барселона»нинг Примерадаги рекорд серияси тўхтади

«Барселона» Испания Примерасидаги ўзининг мағлубиятсиз рекорд сериясини узайтира олмади. Жамоа 37-тур доирасида «Леванте»га меҳмонда 4:5 ҳисобида ютқазиб қўйди.

Каталония клуби учун бу мағлубият жорий мавсумдаги Испания биринчилигида биринчисига айланди. Бундан аввал Эрнесто Вальверде жамоаси 27 ғалаба ва 9 дурангни қайд этганди. Шунингдек, «Барса» 2016/2017-йилги мавсумда сўнгги еттита ўйинда мағлубиятга учрамаган.

Кўк-анорранглилар жорий мавсумнинг сўнгги турида ўз майдонида «Реал Сосьедад»ни қабул қилади. 20 майга режалаштирилган баҳс Тошкент вақти билан соат 23:45да бошланади.