ЕХҲТ бош котиби яна Ўзбекистонга келади

11 июнь куни Европада хавфсизлик ва ҳамкорлик ташкилоти (ЕХҲТ) Бош котиби Томас Гремингер бошчилигидаги делегация Ўзбекистонга ташриф буюради. Бу ҳақда Ташқи ишлар вазирлиги матбуот хизмати хабар берган.

ЕХҲТ делегацияси «Терроризмга олиб келувчи тажовузкор экстремизм ва радикализмнинг олдини олиш ҳамда уларга қарши курашишда ёшларнинг роли» мавзусидаги халқаро конференция ишида иштирок этиши режалаштирилган.

Шунингдек, ташриф дастуридан Олий Мажлис Сенати, Ташқи ишлар вазирлиги, Ўзбекистон Республикаси Президенти ҳузуридаги Стратегик ва халқаро тадқиқотлар институтида учрашув ва музокаралар ўтказиш ўрин олган.

Томас Гремингер 2017 йилнинг ноябрида ҳам Ўзбекистонга келиб, мамлакат президенти Шавкат Мирзиёев қабулида бўлганди.