Туркиянинг Эскишеҳер вилоятида Трансанатолия газ қувури – TANAP’нинг тантанали очилиши бўлиб ўтди. Бу газ қувури орқали Озарбойжон гази Россияни четлаб ўтган ҳолда Европага етказилади.
Компрессор-ўлчаш станциясида ўтган маросимда Туркия президенти Ражаб Тоййиб Эрдўған, Озарбойжон президенти Илҳом Алиев, Сербия президенти Александр Вучич ва Украина президенти Пётр Порошенко иштирок этди.
Эрдўған ўз нутқида ушбу лойиҳани “Энергетик Ипак йўли” деб атаган.
Газ қувурининг ўтказиш қуввати йилига 16 млрд кубметр газни ташкил қилади, бу ҳажмдан 6 млрд кубметрини Туркия олади, қолган 10 млрд кубметри Европа жанубидаги давлатларга етказилади.
Узунлиги 1850 км бўлган газ қувури орқали Озарбойжоннинг Шох-Дениз конидан олинадиган газ Туркиянинг ғарбий чегараларигача етказилади.
