15 июль кунидан бошлаб хориж мамлакатлари фуқаролари Ўзбекистонга кириш визасини олиш учун дипломатик вакиллик ёхуд Ўзбекистоннинг чет эллардаги консуллик идорасига расмий мурожаат қилиши шарт эмас. Президент Шавкат Мирзиёев 4 июль куни имзолаган ҳужжатда шундай дейилади. Унга кўра, чет эл фуқаролари янги ташкил этилган  «E-visa.uz» кириш визаларини расмийлаштириш тизими орқали Ўзбекистонга кириш ҳуқуқини берувчи визани қўлга киритиши мумкин.

Хориж мамлакатлари фуқаролари Ўзбекистонга кириш электрон визасини олиш учун қандай маълумотларга эга бўлишлари керак?

  • www.e-visa.gov.uz ҳаволаси орқали порталга мурожаат қилинади;
  • индивидуал ёки гуруҳ бўлиб мурожаат қилиш тартиби мавжуд;
  • мурожаат берилган кунни ҳисобга олмаганда 2 ишчи куни давомида кўриб чиқилади;
  • визанинг амал қилиш муддати расмийлаштирилган кундан бошлаб 90 кун;
  • 30 кунлик муддатга бир марталик кириш учун расмийлаштирилади;
  • визани расмийлаштириш нархи - 20 АҚШ доллари;
  • кириш ҳужжатларини олиш соддалаштирилган давлатлар фуқаролари учун.

E-VISA'ни олиш учун мурожаат қилиш тартиби қандай?

  1. www.e-visa.gov.uz порталига кириш;
  2. Аризачининг маълумотларини киритиш;
  3. Сурат ва паспорт сканини юклаш;
  4. Электрон почта орқали аризани тасдиқлаш;
  5. «VISA» халқаро тўлов тизими орқали давлат божини тўлаш;
  6. Мурожаат қайта ишланишининг тугашини кутиш;
  7. Электрон почтадан визага берилган сўровнинг ҳолати ҳақида хабар олиш;
  8. Тайёр визани чоп этиш учун консультациялар сервисига ўтиш.

Консультациялар сервиси воситасида мурожаат ҳолатини текшириш имкони мавжуд.