Головин «Монако»да. Трансфер тафсилотлари

Россия терма жамоаси аъзоси, Москванинг ЦСКА клуби ярим ҳимоячиси Александр Головин «Монако»га ўтмоқда. Айни вақтга келиб монегаскликлар клуби ушбу россиялик футболчи трансферини тасдиқлаган.

Ушбу 22 ёшли футболчи бугун Монакога учади ва янги клуби учун тиббий кўрикдан ўтади. Шундан сўнг клублар вакиллари трансфер шартномасини, футболчи билан эса шахсий шартнома имзоланиши мумкин.

«Спорт Экспресс» маълумотига кўра, футболчи билан 5 йиллик ҳамкорлик бўйича келишувга эришилган, трансфер қиймати 30 миллион еврони ташкил этади. 

Бундан ташқари, футболчи кейинроқ бошқа жамоага сотилса, ЦСКА трансфердан улуш олади.

Футболчининг йиллик маоши 2 миллион еврога тенг бўлади.

Головин жаҳон чемпионатида Россия терма жамоаси сафида ёрқин ўйинлар кўрсатгач, Европа клубларининг қизиқишларига сабаб бўлганди. Дастлаб Туриннинг «Ювентус» клуби футболчи трансферини деярли ҳал қилганди, кейинроқ «Челси» асосий даъвогарга айланди. Аммо футболчи бу жамоаларда асосий таркибдан муқим ўрин эгаллашига кафолат бўлмагани туфайли Франция чемпионати иштирокчисини танлади.

Қайд этиш керакки, Головин эндиликда энг қимматбаҳо россиялик футболчига айланади.

РПЛдан Европага трансфер бўлган энг қимматбаҳо россиялик футболчилар:

Марат Измайлов (2008) – «Локомотив»дан «Спортинг»га - 4,5 млн евро;

Павел Погребняк (2009) – «Зенит»дан «Штутгарт»га - 4,8 млн евро;

Александр Кержаков (2006) – «Зенит»дан «Севилья»га -  5 млн евро;

Дмитрий Аленичев (1998) – «Спартак»дан «Рома»га - 7 млн евро;

Динияр Билялетдинов (2009) – «Локомотив»дан «Эвертон»га - 10 млн евро;

Андрей Аршавин (2009) – «Зенит»дан «Арсенал»га - 16,5 млн евро;

Роман Павлюченко (2008) – «Спартак»дан «Тоттенҳэм»га - 17,4 млн евро;

Юрий Жирков (2009) – ЦСКАдан «Челси»га - 21 млн евро;

Александр Головин (2018) – ЦСКАдан «Монако»га 30 млн евро.