«Ўзбекистон ҳаво йўллари» МАК матбуот хизмати 16 июль куни «Урганч» халқаро аэропорти техник сабаблар ва иссиқ об-ҳаво туфайли вақтинча ёпилгани ҳақида хабар берган эди.
«Kun.uz» манбасининг маълумотига кўра, аэропортнинг ёпилишига учиш-қўниш йўлагининг ишдан чиқиши сабаб бўлган. Хусусан, «Турк ҳаво йўллари» самолётининг Урганчдан учиб кетиш чоғида, об-ҳаво ҳароратнинг жуда баландлиги сабабли, учиш-қўниш йўлагига зарар етказилган, унинг баъзи жойларида асфальт эриб кетган.
Ҳозирги кунда Урганчдаги аэропортда учиш-қўниш йўлагининг асфальт қопламасини алмаштириш бўйича таъмирлаш ишлари жадаллик билан давом этмоқда.
Аввалроқ, аэропортнинг 10 август куни ишга туширилиши ҳақида хабарлар тарқалган эди. Бироқ, янги маълумотларга кўра иш 20 августгача давом этиши мумкин.
Айни пайтда, Урганчга келадиган ва Урганчдан учиб кетадиган барча йўналишлар бўйича рейсларга чипта сотилиши тўхтатилган. Урганчга қўниб ўтадиган халқаро рейслар эса Қорақалпоғистон Республикаси маркази Нукус шаҳри аэропортига йўналтирилмоқда.
Аэропорт ёпилишидан олдин, Урганчдан ва Урганчга амалга ошириладиган рейсларга чипта харид қилган йўловчилар учун «Ўзбекистон ҳаво йўллари» МАК Урганч - Нукус ва Нукус - Урганч йўналиши бўйича бепул автобус қатнови ташкил қилиб берган.
Чипта сотиб олиш жараёнида ўз шахсий телефон рақамларини қолдирган йўловчиларнинг барчаси қўнғироқ орқали рейснинг Нукусга кўчирилгани ҳақида огоҳлантирилган. Йўловчи аэропортга 4 соат олдин келиши ва автобусда Нукус шаҳрига бепул элтиб қўйилиши айтилган. Телефон рақамини қолдирмаган ва Урганчдаги аэропорт ёпилганидан бехабарлиги туфайли, рейсга кеч қолган баъзи йўловчиларга эса чипталари яқин рейсларга бепул алмаштириб берилган.
«Ўзбекистон ҳаво йўллари» МАК рейсларига сотилаётган чипталарда йўловчилар маълумот олиши учун 0 371 140 02 00 телефон рақами белгилаб қўйилган. Бундан ташқари, Урганч халқаро аэропортида маълумот олиш учун 0 362 224 59 59 рақами ишлаб турибди.
Аэропорт маъмуриятининг маълумотига кўра, унинг фаолияти 10 августгача тикланиши бўйича барча ишлар жадал олиб борилмоқда. Бироқ, ишлар режадан ортда қолса, унинг фаолияти 20 август куни тикланиши кутилмоқда.
