Шаҳрам Ғиёсов ва Муроджон Аҳмадалиевнинг навбатдаги рақиблари маълум бўлди

Бокс бўйича Рио Олимпиадаси совриндори, жаҳон чемпиони Шаҳрам Ғиёсов навбатдаги жангини 17 август куни (Тошкентда 18 август) ўтказади. Бу ҳақда Миллий олимпия қўмитаси ахборот хизмати хабар бермоқда.

Қайд этилишича, АҚШнинг Калифорния штатида бўлиб ўтадиган жангда ҳамюртимизга ганалик Альберт Менса рақиблик қилади.

Маълумот учун, Шаҳрам шу кунгача профессионал рингда учта жанг ўтказган ва уларнинг ҳар учаласида ғалаба қозонган (2таси нокаут билан). Африкалик боксчи эса 38та жанг ўтказиб, уларнинг 31тасида ғолиб бўлган (15тасида рақибларини нокаутга учратган). Олтита жангда мағлубиятга учраган бўлса, битта баҳсда дурангга эришган.

Шунингдек, бокс бўйича Олимпия ўйинлари ва жаҳон чемпионати совриндори Муроджон Аҳмадалиевнинг навбатдаги рақиби ва жанг санаси ҳам маълум бўлди.

Унга кўра, ҳамюртимиз 23 август куни АҚШнинг Лос-Анжелес шаҳрида чилилик Рамон Контрерасга қарши рингга кўтарилади.

Маълумот учун, Аҳмадалиев бунгача учта жанг ўтказиб, уларнинг барчасида ғалаба қозонган (2таси нокаут билан). Контрерас эса проф рингда 21 маротаба рингга кўтарилиб, уларнинг 15тасида ғолиб бўлган (6таси нокаут билан). 6та жангда эса мағлубият аламини тотиб кўрган (5таси нокаут билан).