Йил бошидан буён Қирғизистоннинг қанча фуқароси Ўзбекистонга келгани маълум

2018 йил январь-июль ойларида Ўзбекистонга ташриф буюрган Қирғизистон фуқароларининг сони 500 минг кишини ташкил этди.

Ўзбекистоннинг Қирғизистондаги элчиси Комил Рашидов Tazabek нашрига шу ҳақда маълум қилди.

«Ўйлашимча, бу йил Қирғизистонга ташриф буюрган Ўзбекистон фуқароларининг сони ҳам шундай - ярим миллион», - деди у.

Элчининг қўшимча қилишича, бу рақам аввалги йилларга нисбатан ортган.

«Чегарачиларнинг айтишича, фақат «Достук» назорат ўтказиш пунктидан камида 10 минг киши ўтмоқда», - дейди у.

Эслатиб ўтамиз, икки мамлакат ўртасида 60 кунлик визасиз режим амал қилмоқда, бу туристлар учун қулай шароит яратади.