Ўзбекистон терма жамоаси яримҳимоячиси Сервер Жепаров яқинда Қозоғистоннинг «Жетису» клуби билан шартнома имзолади. 

Ўзбекистон терма жамоасининг янги бош мураббийи Эктор Купер 35 ёшли футболчини илк йиғинига таклиф қилмади. 

Сервер Жепаров шу воқеалар юзасидан Sports.uz нашрига интервью берди.

- Сервер, фаолиятингизни нега Қозоғистоннинг «Жетису» жамоасида давом эттиришга қарор қилдингиз?

- Менда иккита вариант бор эди. Эронда қолиш ёки Қозоғистонда фаолиятни давом эттириш. Эрон чемпионати ниҳоясига етганидан сўнг, «Истиқлол» билан имзоланган келишув ҳам ўз кучини йўқотганди. Шу боис таниш-билишларни ишга солган ҳолда, ўзимга мос келадиган жамоани қидиришда ёрдам сўрадим. Кўп ўтмай ҳаммаси ойдинлашиб, «Жетису» варианти юзага келди. Икки кун давом этган музокаралардан кейин ушбу жамоа билан келишувга эришдим. Бош мураббий, спорт директори ва менинг иштирокимда ўтган якуний музокарада ҳаммасини ўзаро ҳал қилишга муваффақ бўлдик.

- 35 ёшда легионер бўлиб ўйнаш қийин. Шу боис таклифни танлашда иккиланмадингизми?

- Легионер бўлиш жуда қийин иш. 2010 йилдан бери легионерман. Айтиш мумкин бўлса, бунга кўникиб кетдим. Шу сабаб «Жетису» билан келишувга эришиш унчалик мураккаб бўлмади. Қолаверса, саккиз йилдан бери четда юраверганим туфайли, янгича шарт-шароит ва муҳитга кўникма ҳосил қилишим осон кечмоқда. «Жетису» варианти борасида узоқ ўйланишимга тўғри келмади. Мен муносиб таклиф келиб тушишини кутгандим холос.

- Миллий терма жамоамиз янги бош мураббий – Эктор Купер бошчилигида йиғинни бошлаган. Аммо у сизни бўлажак ўйинлар учун чақирмади. Айтинг-чи, термадаги фаолиятингизни якунлаш ҳақида ўйлаяпсизми?

- Миллий терма жамоамизни тажрибали мураббий қабул қилиб олганидан жуда хурсандман. Унинг терма жамоага мени чақирмагани масаласига келсак, ҳаммасини тўғри қабул қилиш керак. Ахир бош мураббий жамоага кимларни чақиришни ўзи ҳал қилади. Чунки ҳар бир мутахассиснинг ўйинни ташкил этиш борасида ўз ғоялари бўлади. Мен терма жамоадаги фаолиятимни тугатиш ниятим йўқ. Бу ўз навбатида клуб миқёсидаги фаолиятимга ҳам тааллуқлидир. Сабаби, ўзимни жуда яхши ҳис қиляпман. Шунинг эвазига клубим олдига қўйиладиган вазифаларни бажаришда фойдам тегиши мумкинлигига ишонаман. Мен буни «Истиқлол»да тўп суриб юрган чоғимда ҳам исботладим. Ушбу жамоа билан Осиё Чемпионлар лигаси чоракфиналига чиқдим.

- Умуман олганда, сизнинг Купер ҳақидаги фикрингиз қандай? У бизни жаҳон чемпионати сари етаклаб бора оладими?