«Kun.uz» сайтида эълон қилинган «Россияга қонуний йўл билан ишлаш учун кетган меҳнат мигрантлари нега сарсон этилди?» сарлавҳали мақола юзасидан Ташқи меҳнат миграцияси масалалари агентлиги тезкор текширув-суриштирув ишлари олиб борилди.
Агентликнинг мавзу юзасидан хулосаларида қуйидагилар баён этилади.
«Мақолада асосий масала сифатида фуқароларнинг қонуний йўл билан Россияга ишлаш учун кетганига қарамай, сарсон-саргардон бўлиб, қийин аҳволда Ўзбекистонга қайтганликлари баён этилган.
Хусусан, иш берувчи томонидан
- биринчидан, дастлабки шартномада кўрсатилган шартлар (кундуз 8 соатдан 3 кун, кечга 8 соатдан 3 кун иш, 3 кун дам олиш)нинг бажарилмагани;
- иккинчидан, Россия Федерациясида қонуний ишлаш ҳуқуқини берувчи рухсатнома берилишининг номаълум сабабларга кўра кечиктирилгани;
- учинчидан, оғир меҳнат ва оғир яшаш шароитлари туфайли айрим фуқароларнинг иш жойини тарк этиб, турли жойларда сарсон-саргардон бўлишгани;
- тўртинчидан, фуқароларга етказилган ушбу моддий ва маънавий зарарни қоплаб бериш кераклиги алоҳида таъкидланиб, тегишли органлар томонидан бу вазиятга ойдинлик киритилиши айтилган.
Мазкур ҳолатни атрофлича ўрганиш ҳамда вазиятни холис баҳолаш мақсадида Бандлик ва меҳнат муносабатлари вазирлиги бу ишга тааллуқли ташкилотлар ва фуқаролар билан суҳбатлашиб, вазиятга ойдинлик киритган.
Москва шаҳрига ишлаш учун юборилган 23 нафар фуқародан иборат гуруҳга бошлиқ этиб тайинланган Ботир Мамашарифович Багировнинг сўзларига кўра, Домодедово аэропортига етиб боришлари билан «Евроосиё Меҳнат ресурслари» МЧЖ ходимлари уларни кутиб олиб, қулай шароитларга эга автобусда патент олгунларига қадар яшаб турадиган шинам ётоқхонага етказган. У ерда вақтинчалик рўйхатдан ўтказиб, келгусида қилинадиган ишлар ҳақида маълумот берилган. Бироқ, гуруҳнинг айрим аъзолари рухсатнома олиш учун тўланадиган пулларни бир ҳафтага кечиктиргани боис, рухсатномалар 8 кунга кечикиб чиққан. Бу вазиятда фуқаролар ўзлари айбдор бўлишига қарамай, «Евроосиё Меҳнат ресурслари» МЧЖ ўз ҳисобидан уларнинг яна 8 кунлик яшаш ва кунига уч маҳал овқатланиш харажатларини қоплаб берган. Рухсатномани 2018 йил 30 июлда олган 13 нафар фуқаро иш берувчининг ёнига, Подольск шаҳрига боришган. Бироқ, у ерда иш берувчи томонидан кунлик 160 рубль тўланадиган ётоқ жой фуқароларни қониқтирмагани сабабли, «Евроосиё Меҳнат ресурслари» МЧЖ ходимлари шу куннинг ўзида кунлик 220 рубль бўлган бошқа ётоқ жой билан таъминлаган. Эртаси куни иш берувчининг вакили келиб, 2540 рублдан аванс тарқатган ва иш тартибини тушунтирган. Иш жойи узоқроқ бўлгани учун уларни олиб бориб, олиб келадиган автобус ажратилган. Шуларни инобатга олиб, уларга 12 соатлик иш режими, яъни кундузи 3 кун, кечаси 3 кун ва 3 кун дам олиш таклиф этилган. Гуруҳ фақатгина 30 июлдан 14 августгача меҳнат фаолиятини амалга оширган. Шу вақт оралиғида иш берувчи гуруҳдаги ҳар бир одамга 3 марта, жами 9500 рублдан аванс пули берган.
