Ўсмирлар Олимпиадаси якунлари. Энг кўп медални Ўзбекистон қайси спорт турларида қўлга киритди?

Кеча, 18 октябрь куни Аргентинанинг Буэнос-Айрес шаҳрида III ёзги ўсмирлар Олимпия ўйинлари якунланди. Бу сафарги «кичик Олимпиада» ўзбекистонлик спортчилар учун муваффақиятли ўтди, мамлакат медаллар сифати бўйича умумжамоа ҳисобида 206 мамлакат ичида 13-ўринни эгаллади. Бу орқали Ўзбекистон спорти ўсмирлар Олимпиадасидаги ўз натижасини яхшилади.

• Маълумот учун, ўзбекистонлик ўсмирлар 2010 йилги Сингапур олимпиадасида 2 та кумуш ва 4 та бронза билан умумжамоа ҳисобида 62-ўринни, орадан тўрт йил ўтиб Нанкинда 2 та олтин, 3 та кумуш ва 3 та бронза медалларини кўлга киритган ҳолда 27-ўринни банд этган.

Бу галги Олимпиадада қайси спорт турлари бўйича мусобақалар Ўзбекистон делегацияси вакиллари учун муваффақиятли ўтди? Миллий олимпия қўмитаси ахборот хизмати шу ҳақда баъзи маълумотларни келтириб ўтди.

Буэнос-Айрес Олимпиадаси айниқса ўзбекистонлик оғир атлетикачилар учун муваффақиятли кечди. Федерация спортчилари Аргентинадаги ўйинларга учта лицензия қўлга киритишганди. Якунда мусобақада иштирок этган ҳар уччала спортчи ҳам медалларга сазовор бўлди. Кумуш Файзуллаева, Муҳаммадқодир Тоштемиров ва Долера Давроновалар мос равишда олтин, кумуш ва бронза медаллари билан қайтадиган бўлишди. Қайд этиш жоиз, ўзбекистонлик оғир атлетикачилар шу кунгача ўсмирлар Олимпия ўйинларида олтин медалга сазовор бўлмаганди.

Спорт курашлари баҳсларида ҳам ўзбек полвонлари жуда яхши иштирок эта олишди: тўрт спортчидан уч нафари совриндорлар қаторидан ўрин олди. Ўзбекистонлик полвонлар делегация ҳисобига 3 та медаль (1 та олтин, 1 та кумуш ва 1 та бронза) қўшиб қўйишди. Аёллар кураши баҳсларида қўлга киритилган медаль Ўзбекистон учун ўсмирлар Олимпиадасидаги дастлабкиси бўлди: Шоҳида Абдуллаеванинг кумуш медали Ўзбекистон спорт курашлари ассоциацияси учун тарихий ахамият касб этди. Курашчилардан Умиджон Жалолов шоҳсупанинг энг юқори поғонасидан жой олган бўлса, делегация байроқдори Муҳаммадрасул Раҳимов бронза медали соҳибига айланди.

Эшкак эшиш бўйича баҳсларда олти нафар спортчи Ўзбекистон шарафини ҳимоя қилди. Байдарка ва каноэда эшкак эшишнинг яккалик баҳсларида мамлакат спортчилари илк марта ўсмирлар Олимпия ўйинларида медалларга сазовор бўлишди. Спортнинг ушбу турида мос равишда олтин ва кумуш медалларни қўлга киритган Гулбаҳор Файзиева ва Ислом Абдусаломов билдирилган ишончни оқлай олди.

Бокс – комплекс мусобақаларда Ўзбекистон учун медаль тақдим этадиган асосий спорт тури. Аргентинага тўрт нафар чарм қўлқоп устаси йўл олган эди. Мусобақа якунларига кўра, уларнинг уч нафари совриндорлар қаторидан ўрин ола билди. Абдумалик Халаков олтин медалга эга чиққан бўлса, Жаҳонгир Раҳмонов ва Тимур Мержановлар делегация жамғармасини бронза медаллари билан бойитди.

Эътиборлиси, Абдумалик Халаков олтин медални қўлга киритиши баробарида Бектемир Мелиқўзиевнинг натижасини такрорлай олди. Энди унда ҳам Бектемир каби ёшлар ўртасидаги жаҳон чемпионати ва ўсмирлар Олимпиадасининг олтин медаллари бор.

Дзюдо бўйича Ўзбекистон терма жамоаси мусобақага икки спортчи билан ташриф буюрган эди. Якунда уларнинг ҳар иккиси ҳам совриндор бўла олди. Жайҳунбек Назаров дзюдонинг микст йўналишида олтин медалга сазовор бўлган бўлса, Нилуфар Ермагамбетова бронза соҳибаси бўлди.

Таэквондо бўйича баҳсларда Улуғбек Рашитов ўзбекистонлик таэквондочи йигитлар ичида ўсмирлар Олимпиадасининг кумуш медалини қўлга киритган илк спортчи бўлди.

Каратэ беллашувларида қатнашган Дилдора Алиқулова гуруҳ баҳсларида мағлубиятсиз қатнашиб, ярим финалгача етиб бора олди. Финал остонасида эса япониялик рақибга тўқнаш келди. Каратэ ватани саналган кунчикар юрт вакилига қарши жангда Дилдорага бироз омад етишмади ва у якунда бронза билан кифояланди.

Шунингдек, делегация таркибидаги энг ёш атлет, гимнастиканинг микст баҳсларида иштирок этган Индира Ўлмасова (14 ёш) ҳам бронза медалига сазовор бўлди. 

Ўзбекистон вакиллари енгил атлетика бўйича беллашувларда ҳам медаллар қўлга киритишга жуда яқин келганди. Аммо Роксана Худоярова (учхатлаб сакраш) ва Регина Адашбаева (босқон улоқтириш)дан сўнгги паллаларда омад юз ўгирди ва улар тўртинчи ўрин билан кифояланишди.

Хулоса қилиб айтганда, Буэнос-Айрес Олимпиадасида Ўзбекистон номидан 37 нафар атлет спортнинг 16 турида баҳсларда қатнашди ва якунда 16 та медални (5 та олтин, 4 та кумуш ва 7 та бронза) қўлга киритди. Мамлакат умумжамоа ҳисобида, юқорида таъкидланганидек, 13-ўринни эгаллади.

Қуйида кичик Олимпиадада кумуш ва бронза медалларига сазовор бўлган ўзбекистонлик ёш атлетлар билан ҳам танишишингиз мумкин. Суратлар муаллифи - Анвар Ильясов.