Kun.Uz мақоласидан сўнг: Навоий адлия бошқармаси фуқаролар ҳақини ундириш мақсадида ҳокимликни судга берди

Навоий вилояти адлия бошқармаси Навоий шаҳар ҳокимлигини фуқаролар ҳақ-ҳуқуқларини ҳимоя қилиш мақсадида Фуқаролик ишлари бўйича Кармана туманлараро судига берган. Бу борада шаҳар прокуратураси билан ҳамкорлик қилинган. Вилоят адлия бошқармаси Инсон ҳуқуқларини ҳимоя қилиш бўлими бошлиғи Даврон Ҳусанов Kun.Uz мухбири билан мулоқотда шу ҳақда маълум қилди.

Видео: Tas-IX

Видео: YouTube

Шу йилнинг 4 сентябрь куни “Навоийлик фуқароларга бузилган уйлари учун товон пули бериш рад этилмоқда, сабаби нимада?” сарлавҳали танқидий мақола (лавҳа июль ойи ўрталарида суратга олинган) эълон қилинган эди. Унда Навоий шаҳар Ғалаба шоҳ кўчасини кенгайтириш муносабати билан 165дан ортиқ якка тартибдаги уй-жойлар бузилгани, бироқ 17 оиладан бошқа фуқаролар, жумладан таҳририятга мурожаат қилганларга ҳам товон пули берилмагани, уй-жойлари бузилганларга компенсация пули бериш рад этиб келингани, суд маҳкамаларининг барча босқичлари шаҳар ҳокимининг ҳар бир фуқаро учун алоҳида қарори мавжуд эмаслигини рўкач қилиб, ҳокимликдан товон пули ундириш бўйича даъво аризаларини рад этиб келгани ва бошқа масалалар ёритилган эди. 

Таҳририят тасвирга олиш гуруҳи октябрь ойи бошида мазкур ва бошқа танқидий мақолалардаги фактларни вилоят мутасадди идоралари қай тарзда ўрганганини билиш мақсадида Навоий вилоятига яна бир бор ташриф буюрди. Даставвал одатдагидек, мурожаатчилар билан учрашдик.

Мурожаатчиларнинг айтишларича, танқидий мақола эълон қилинганидан сўнг, вилоят Адлия бошқармаси фуқароларни чақирган ҳамда прокуратура билан биргаликда муаммони ечиб беришини билдирган. Адлия бошқармаси ходими, Навоий шаҳар ҳокимлигидан товон пули ундириш мақсадида фуқаролар манфаатлари кўзланган ҳолда даъво аризаси киритилишини, бузилган уй-жойларни баҳолаш бўйича махсус экспертиза ўтказилиб, барча зарарлар ундирилишини таъкидлаган.

Мурожаатчилар билан мулоқотни поёнига етказганимиздан сўнг, шаҳар прокуратурасига бориб, мазкур муаммо юзасидан ўрганишларни олиб борган ходима Моҳина Мирзаева билан учрашишни ният қилдик. Бироқ Мирзаева бошқа туманга ишга ўтганлиги сабабли у билан учрашиш имкони бўлмади. Аммо, шаҳар прокуратураси масъул ходими Шерзод Ҳайдаровнинг билдиришича, Мирзаева масалани вилоят адлия бошқармаси билан ҳамкорликда ўрганиб, Фуқаролик ишлари бўйича Кармана туманлараро судига Навоий шаҳар ҳокимлиги устидан фуқаролар ҳақ-ҳуқуқларини тиклаш мақсадида ариза топширишда иштирок этган. 

Биз шаҳар прокуратурасидан чиқиб, фуқаролик судига топширилган аризани кўриб чиқиш қайси босқичда эканини аниқлаш, фуқаролар ҳақ-ҳуқуқлари ҳимоя қилиниши хусусида қандай ишлар амалга оширилаётганини билиш мақсадида вилоят адлия бошқармасига ҳам ташриф буюрдик. Бу ерда вилоят Адлия бошқармаси Инсон ҳуқуқларини ҳимоя қилиш бўлими бошлиғи Даврон Ҳусанов билан суҳбатлашдик.

“Kun.Uz сайтида мақола эълон қилинганидан сўнг, Навоий шаҳар прокуратураси билан ҳамкорликда ушбу фуқароларнинг муаммоларини ўрганиб чиқдик. Аниқланишича, ушбу кўчанинг икки ён тарафидаги уйлар “Умид ниҳоллари” спорт мусобақалари муносабати билан йўлнинг кенгайтирилиши сабабли бузилиши белгиланган. Бироқ, Вазирлар маҳкамасининг айнан шу қарорида уй-жойи бузиладиган 165 фуқаронинг рўйхати шакллантирилмаган. Кейинчалик, шаҳар ҳокимининг тегишли қарори билан 17 нафар уйи бузилган фуқарога Кармана туманидан ер участкалари ажратиш ва компенсация пулларини тўлаб бериш амалга оширилган. Шундан сўнг, айрим фуқаролар мустақил равишда судга мурожаат қилиб, улар ҳам товон пуллари олгани маълум бўлган”, - деди Даврон Ҳусанов.

Унинг таъкидлашича, мақолани ўрганиш жараёнида таҳририятга мурожаат қилган фуқаролар, маҳалла, вилоят Архитектура ва қурилиш бошқармаси, вилоят “Ермулккадастр” ДУК билан ҳамкорликда тегишли ҳужжатлар тўпланган. Бироқ, масаланинг бир тарафи борки, бугунги кунда уйлар бузилган, уларнинг компенсация миқдорини аниқлаш учун қурилиш-техникавий экспертизасини тайинлаш керак бўлади. 

“Навоий шаҳар ҳокимлигидан 6 нафар фуқаро манфаатларини кўзлаб, уларга компенсация ва маънавий зарарни ундириш мақсадида Кармана туман фуқаролик судига Навоий шаҳар прокуратураси билан ҳамкорликда даъво аризаси киритдик. Ҳозирда Янгиариқ ва Истиқлол маҳаллаларида уйлари бузилган ва товон пули олмаган фуқаролар бўлса, бизларга мурожаат қилишлари мумкинлиги айтилган”, - деди Навоий вилояти Адлия бошқармаси бўлим бошлиғи.

Унинг сўзларига кўра, фуқароларнинг бузилган ҳақ-ҳуқуқлари суд тартибида тикланиши ва уларга компенсация ва маънавий зарар пуллари ундириб берилишига умид қилса бўлади. 

Мақола тайёрланиш жараёнида маълум бўлишича, Фуқаролик ишлари бўйича Кармана туман судига киритилган даъво аризаси рўйхатига яна бир фуқаро исм-шарифи қўшилган ва Адлия бошқармаси 7 кишининг манфаатини ҳимоя қилади. 

Kun.Uz таҳририяти фуқаролар ҳақ-ҳуқуқлари, манфаатлари тикланишига умид ва ишонч билдириб қолади.