Макрон Трампга Европадаги хавфсизликни мустаҳкамлаш зарурлигини айтди

Франция президенти Эммануэль Макрон АҚШ президенти Дональд Трамп билан учрашувда Европадаги хавфсизликни мустаҳкамлаш зарурлигини билдирди.

"Бугунги кунда Европа хавфсизлигини биргина Қўшма Штатлар таъминлаши адолатдан эмас… Шунинг учун бу вазифани бўлишиб олиш учун бизга Европанинг кўпроқ имконияти, кўпроқ мудофааси зарур деб ўйлайман", — деди Макрон.

Франция президенти Европа НАТО доирасида мудофаа учун харажатлардаги улушини ошириши  лозимлигини айтди.

"Мен президент Трампнинг биз ҳам НАТОда мудофаа учун харажатларда кўпроқ қатнашишимиз тўғрисидаги фикрига қўшиламан ва шунинг учун менинг Европа мудофааси бўйича таклифларим бунга тўлиқ мос келади деб ўйлайман. Бу Европанинг НАТОда кўпроқ қатнашишини, кўпроқ имкониятларни билдиради. Бу адолатдан бўлади деб ўйлайман", — дея қайд этди Макрон.

11 ноябрь куни Францияда Биринчи жаҳон уруши якунланганлигининг юз йиллиги нишонланади. Ушбу санага бағишланган тинчлик форумига дунёнинг 60дан ортиқ давлатлари ва ҳукумат раҳбарлари таклиф этилган.