Нигерия президенти қиёфадоши ҳақидаги гапларни уйдирма деб атади

Нигерия президенти Муҳаммаду Бухорий Польшада нигерияликлар билан учрашув вақтида унинг ўрнига қиёфадоши иштирок этгани ҳақидаги гапларни уйдирма деб атади. 

“Бугун (2 декабрь) Польшада нигерияликлар билан учрашувимда кўтарилган масалалардан бири менинг клонлаштирилганим ёки йўқлиги ҳақидаги савол бўлди. Нодонларча гаплар ажаблантирмайди: мен ўтган йил соғлиғим муносабати билан таътилда бўлганимда, кўпчилик мени ўлди, деб умид қилганди”, деб ёзган президент твиттерда. “Мен барчангизни ишонтириб айтишим мумкин, мен ҳақиқийман. Шу ойда 76 ёшимни нишонлайман”, деб изоҳ берган президент Польшадаги учрашувдаги нутқи видеосига.  

Бухорийнинг айтишича, Нигерия вице-президенти Йеми Осинбажо ҳам у йўқлигида турли миш-мишларга дуч келган. Баъзи одамлар Бухорийни ўлган ва унинг ўрнини Осинбажо эгаллаган деб ўйлаб, у билан боғланиб вице-президентликка ўз номзодларини таклиф қилишган.

2017 йил май ойида Бухорий Буюк Британияга даволанишга йўл олгани ва ўз ваколатларини вице-президент Йеми Осинбажога топширгани маълум қилинганди.