DW хабарига кўра, Нигерия Соғлиқни сақлаш вазирлиги бу ҳақда 20 октябр куни маълум қилган. Вирус Угандадан самолётда келган аёлда топилган.
Уганда Соғлиқни сақлаш вазирлиги бемор Нигерия фуқароси эканини ва мамлакат ҳудудидан фақат транзит сифатида фойдаланганини аниқлаштирган. У бунга қадар Конго Демократик Республикасининг шарқий қисмида хизмат сафарида бўлган.
Угандада аввал ҳам Эбола билан касалланиш ҳолатлари қайд этилган, бироқ кейинчалик расмийлар мамлакатда фаол ҳолатлар қолмаганини эълон қилган эди.
Конго Демократик Республикасида эса Бундибугйо вируси келтириб чиқарган Эбола касаллигининг авж олиши май ойидан бери давом этмоқда. DW келтирган сентябр ўрталаридаги маълумотларга кўра, мамлакатда 7 мингдан ортиқ касалланиш ҳолати тасдиқланган, 3 300 дан зиёд киши вафот этган.
Мамлакатда ҳукумат кучлари ва исёнчи гуруҳлар ўртасида давом этаётган қуролли можаро касаллик тарқалишини чеклаш ишларини қийинлаштирмоқда.
Нигериядаги янги ҳолатдан сўнг расмийлар бемор билан эҳтимолий алоқада бўлган шахсларни аниқлаш ва кузатиш ишларини олиб бормоқда.
