Япониялик футболчи, айни вақтда 51 ёшда бўлган Казуйоши Миура «Йокогама» билан шартномасини узайтирди.
The Japan Times хабарига кўра, у Япониянинг иккинчи дивизиони жамоасида яна бир йил давомида тўп тепади.
Шу тариқа, дунёнинг энг кекса футболчиси бўлиб турган Миура фаолиятидаги ўттиз учинчи мавсумни ўтказади. 26 февраль куни у 52 ёшини қаршилайди.
Маълумот учун, 1967 йилда туғилган япониялик футболчи ўз фаолиятини 1986 йилда, Бразилиянинг «Сантос» клубида бошлаган.
Миура «Йокогама» сафида 2005 йилдан буён ўйнамоқда. Ўтган мавсумда у жами 9та ўйинда умумий ҳисобда 56 дақиқа ҳаракат қилди.
У Япония терма жамоаси сафида 89та ўйин ўтказиб, 55 гол урган.
