Нигериянинг Риверс штатида мамлакат президенти Муҳаммаду Бухорийнинг сайловолди нутқидан кейин юз берган тиқилинчда камида 14 киши ҳалок бўлди. Бу ҳақда Vanguard нашри хабар берди.
Нашр маълумотларига кўра, президентнинг сайловолди митинги Порт-Харкорт шаҳридаги стадионда ўтган. Тиқилинч Бухорий стадионни тарк этгандан кейин бошланган. Қурбонларнинг кўпчилиги одамлар ёпиқ дарвозалар орқали куч билан ўтиб кетмоқчи бўлганда оёқлар остида топталиб ташланган.
“Мен 14 қурбонни тасдиқлашим мумкин. Рақамлар ўзгариши мумкин. Қолган жароҳатланганлар ортидан шифокорлар кузатув олиб бормоқда”, деб айтган Порт-Харкортдаги шифохона вакили.
Нигерияда миллий ассамблея ва президент сайловлари 16 февралда бўлиб ўтади.
