Никимбаев Лина Черязова ҳақида: Олимпиадани онаси икки ҳафта олдин вафот этганини билмасдан ютганди

Таниқли футбол мутахассиси Алишер Никимбаев «Футболиум» Telegram-каналида Ўзбекистоннинг ягона қишки олимпиада чемпиони Лина Черязева ҳақидаги хотиралари билан бўлишди. Эслатиб ўтамиз, фристайл бўйича олимпия чемпиони Лина Черязова узоқ давом этган хасталикдан сўнг, 51 ёшида Новосибирскда вафот этди. 

«Ўзбекистоннинг ягона қишки олимпиада чемпиони Лина Черязева билан бир мактабда ўқиганман. У икки ёш катта эди. Ҳаттоки, шуни айтишим мумкинки, у саккизинчи синфда, мен эса олтинчида ўқиганимда, ўзаро уришиб ҳам кетганмиз. Гарчи бундай ташаббус мендан чиқмаган бўлса-да, ҳозиргача бундан уятдаман.

Шундан кейин биз 1991 йилда учрашдик, ўшанда мен Ўзбекистон Физкультурачиси газетасида ишлардим, у эса Жаҳон кубоги босқичида ғолиб чиққан ва фотосуратларини таҳририятга олиб келганди. У пайтда интернет йўқ ҳамда фристайл бўйича мусобақалардан суратлар фақат баҳс қатнашчиларида бўлиши мумкин эди. У менга табассум қилди, афтидан, таниб қолди. Мен аввалига Линани танимадим. Фақатгина кейин эсладим.

Уч йилдан сўнг Лина Олимпиадада олтин медални қўлга киритди. Шу билан бирга, у онаси икки ҳафта олдин вафот этганини билмасдан ғолиб чиққан. Линадан бу машъум хабарни яширишган, сабаби бу унга олтинни қўлга киритишда тўсқинлик қилиши мумкин, деб ҳисоблашган. Шунинг учун Олимпиададаги ғалаба қувончи даҳшатли хабар билан хиралашди.

Черязовага 2000-йилларда ўз ватанида талаб бўлмади ва у Россияга кўчиб ўтди.

Ва энди Лина биз билан эмас. Аммо у бизнинг спортимиз тарихида абадий қолади», - деб ёзади Никимбаев.

Маълумот учун: Лина Анатольевна 1968 йилда Тошкентда туғилган. 1994 йили Норвегиянинг Лиллеҳаммер шаҳрида ўтган қишки Олимпиадада чемпионликка эришган. Унинг бу медали қишки олимпия ўйинларида ўзбекистонлик спортчилар томонидан қўлга киритилган биринчи ва ягона олтин медаль ҳисобланади. Қолаверса, Лина акробатикадаги фристайл бўйича биринчи олимпиада чемпиони ҳамдир.