«Ювентус»ни чемпионликка яқинлаштирган ўйин, ундаги ҳакамлик можароси, тақдирга тан берган «Наполи» ва Италияда турнинг бошқа воқеалари
|15:43 / 08.04.201911 95813 мин
Фото: Juventus F.CФото: Juventus F.C
Дам олиш кунлари Италия чемпионатида 31-тур ўйинлари ўтказилди. Унда эътиборга лойиқ бўлган бир қанча воқеалар юз берди.
ТУРИНДА ҲАКАМЛИК МОЖАРОСИ
Турнинг марказий ўйини Туринда ўтказилди. «Ювентус» «Альянц Стэдиум»да «Милан» билан беллашди ва 2:1 ҳисобида ғалаба қозонди. Ўйин ҳакамлик билан боғлиқ можарога сабаб бўлди.
Аллегри бу ўйинга экспериментал таркибни туширди. Мураббий аввало Чемпионлар Лигасидан ўрин олган «Аякс»га қарши ўйинни ёдда тутган ҳолда шундай қилган бўлиши мумкин. Натижада, биринчи бўлим меҳмонларнинг устунлигида ўтди ва улар ташаббусни голга айлантира олишди. 39-дақиқада ҳимоячи Бонуччининг хатосидан фойдаланган Бакайоко тўпни қулай вазиятда турган Пёнтекка оширди. Польшалик тўпурар эса дарвозабон билан юзма-юз чиқиб, имкониятдан унумли фойдаланди ва «Милан»ни ҳисобда олдинга олиб чиқди.
Иккинчи бўлимни «Ювентус» фаол бошлади ва 60-дақиқада пенальти ишлаб олди. Дибала уни аниқ амалга ошириб, ҳисобни тенглаштирди. Шундан сўнг, Аллегри таркибда бир қанча ўзгаришларни амалга оширди, хусусан Пьянич ва ёш ҳужумчи Кенни туширди. Натижада, «Ювентус» ташаббусни қўлга олиб, ўйинда бурилиш ясади. 84-дақиқада Кен «Милан» ҳимоячилари хатосидан фойдаланиб, гол уришга эришди ва жамоасига ғалаба келтирди.
Қайд қилиш жоизки, энди чемпионликни расмийлаштириш учун «Ювентус» қолган ўйинларда 1 очко олса кифоя.
Туриндаги баҳсдан кейин «Милан» спорт директори Леонардо бош ҳакам Микаэл Фаббрининг ўйиндаги баъзи қарорларидан норози эканини айтди. Хусусан, рефери 1-бўлимда тўп жарима майдони ичида Сандронинг қўлига текканида «Ювентус» дарвозасига пенальти белгилашдан бош тортди. VAR орқали вазиятни ўрганган Фаббри, негадир қоидабузарлик йўқ эканини қайд этди.
Ўйин охирида эса Манжукич ўз жарима майдони ичида Романьолини очиқчасига тепди. Бу вазиятда ҳам рефери пенальти белгилаши мумкин эди. Аммо негадир VAR тизимидан умуман фойдаланмади.
Натижада, камида 2та ҳолатда бош ҳакам «Ювентус» фойдасига баҳсли қарорларни қабул қилди.
Фаббрининг Туриндаги ғалати қарорлари Италия спорт матбуотининг ҳам диққат эътиборидан четда қолмади. Бир неча марказий спорт нашрлари, собиқ ҳакамлар ва мутахассислар Фаббрининг қўпол хатога йўл қўйганини тан олиб, бунинг сабабларини қизғин муҳокама қилмоқдалар. Бундан ташқари, Италия ҳакамлар уюшмаси (AIA) раҳбари Марчелло Никки «Милан» спорт директори Леонардо ва бош мураббий Женнаро Гаттузони махсус кенгашга таклиф қилган. Sky Sport Italia хабарига кўра, мулозим бу тадбирда Фаббрининг хатоларини тан олиб, «россонери» вакилларидан узр сўраши мумкин. Аммо, бу «Милан» учун ҳеч қандай фойда келтирмаслиги аниқ, жамоа Чемпионлар Лигаси йўлланмаси учун курашда муҳим очколардан маҳрум бўлди.
«НАПОЛИ» БИР ФУТБОЛЧИ КАМ БЎЛИБ ЎЙНАГАН РАҚИБНИ МАҒЛУБ ЭТОЛМАДИ
Чемпионлик пойгасида ютқазганини билиб, тақдирга тан берган «Наполи» ўз уйида «Женоа» билан ўйнади. Беллашувда 1:1 ҳисоби қайд этилди.
Баҳсда мезбонлар катта устунликка эга бўлишди, бироқ якунда ғалаба қозона олишмади. 28-дақиқада меҳмонлар ҳужумчиси Стураро жуда қўпол ўйини учун майдондан четлатилди. Шундан сўнг, «Наполи» ҳисобни очди: Мертенс жарима майдони ташқарисидан кучли ва аниқ зарба йўллаб, чиройли гол урди.
Воқеалар ривожи «Наполи»нинг бу ўйинда йирик ҳисобда ғалаба қозониши мумкинлигига ишора қилгандек эди. Аммо «Женоа» бир ўйинчи кам бўлиб қолгач аҳиллик ва иродани намойиш қила олди. 1-бўлимнинг сўнгги дақиқасида Лазович гол уриб, ҳисобни тенглаштирди.
Иккинчи бўлимда «Наполи» ғалаба учун қанчалик ҳаракат қилмасин, рақиб ҳимоясини ёриб ўтолмади.
Миланда совринли ўринлар учун курашаётган жамоалар тўқнаш келди. 3-ўринни қўлга киритиш учун яхши имкониятга эга бўлган «Интер» Чемпионлар Лигаси йўлланмаси учун курашаётган «Аталанта»ни қабул қилди. Бироқ, мухлислар кутилмаганда нурсиз ўйин гувоҳи бўлишди.
Жамоалар аввало ўз дарвозаси дахлсизлиги ҳақида ўйлаб, рақибнинг хатосини пойлаш билан овора бўлишди. Натижада, ўйин давомида атиги 2та хавфли вазият юзага келди холос.
Биринчи бўлимда «Интер» яримҳимоячиси Весино узоқ масофадан кучли зарба йўллаганида, дарвозабон Голлини маҳорат билан тўпни қайтара олди. Иккинчи бўлимда Наингголан жарима майдонига ёриб кириб, кучли зарба йўллаганида ҳам Голлини жамоасини муқаррар голдан қутқариб қолди.
Дуранг натижа ҳар иккала жамоани қониқтирди десак муболаға бўлмайди. «Интер» 4-ўриндаги таъқибчиси «Милан»дан 5 очко илгарилаб кетди. «Аталанта» эса «россонери» билан тенглашиб олди.
Чемпионлар Лигаси йўлланмасини берувчи 4-ўрин учун бўлган кураш ҳамон қизғин бўлиб қолмоқда. Айни пайтда «Милан», «Аталанта», «Рома», «Лацио» ва «Торино» клублари нуфузли турнирда иштирок этиш учун имкониятларни йўқотмаган. 4-8 ўринни эгаллаб турган бу жамоаларни атиги 3 очко ажратиб турибди ва ҳар бир турдан сўнг, вазият ўзгариб кетмоқда.
«Рома» сафарда «Сампдория» билан беллашиб, 1:0 ҳисобида ғалаба қозонди. 75-дақиқада Де Росси томонидан урилган гол римликларга 3та ўйиндан иборат ғалабасиз серияга якун ясашга ёрдам берди.
«Лацио» ўз майдонида «Сассуоло» билан беллашиб, муҳим очколарни йўқотди. 53-дақиқада Иммобиле пенальтидан ҳисобни очган эди. Аммо меҳмонлар ирода намойиш қилиб, кетма-кет 2та гол уришга муваффақ бўлишди. 57-дақиқада Рожерио, 89-дақиқада Берарди «Лацио» дарвозасини ишғол қилди. Аммо римликлар ўйин якунида мағлубиятдан қутулиб қолишди. Ҳакам томонидан қўшиб берилган дақиқаларнинг бешинчисида Лулич жамоасини мағлубиятдан қутқариб қолди. Бу натижа шубҳасиз мезбонларни умуман қониқтирмади.
«Торино» сафарда «Парма» билан беллашиб, 0:0 ҳисобида дуранг ўйнади. Ўйин тенг курашлар остида ўтди ва жамоалар бир қанча вазиятлардан фойдалана олишмади.
«Челси»нинг собиқ бош мураббийи Антонио Конте «Интер» клубида иш бошлаши мумкин. Calciomercato хабарига кўра, италиялик мутахассис «нерадзурри»ни бошқаришга рози бўлган.
«Интер» спорт директори Беппе Маротта айнан Контенинг бош мураббий қилиб тайинланишини истамоқда. Аввалроқ, ҳар иккаласи ҳам «Ювентус»да бирга ишлаган эди. Айни пайтда «Интер»ни бошқараётган мураббий Лучано Спаллетти Чемпионлар Лигаси йўлланмаси қўлга киритилмаса, катта эҳтимол билан истеъфога чиқарилади.
КЕН — ЕВРОПА ЛИГАЛАРИНИНГ ЭНГ САМАРАЛИ ФУТБОЛЧИСИ
«Ювентус» ҳужумчиси Мойзе Кен «Милан» (2:1) клубига қарши ўйинда дарвозани ишғол этиб, гол уриш тезлиги бўйича Европа лигалари пешқадами бўлиб олди.
Opta хабарига кўра, Кен ҳар 47 дақиқада 1 гол урмоқда ва бу Европада камида 2та гол урган барча футболчилар орасидаги энг яхши кўрсаткичдир. Қайд қилиш жоизки, А Сериянинг жорий мавсумида 19 ёшли футболчи 5 марта рақиб дарвозасини ишғол этган.
РОНАЛДУ ЖАРОҲАТИДАН ТИКЛАНИБ ОЛДИ
«Ювентус» ҳужумчиси Криштиану Роналду жароҳатидан тўлиқ тикланиб олди. Бу ҳақда бош мураббий Массимилиано Аллегри хабар берди.
«Роналду тўлиқ соғайиб кетди ва тикланиб олди. Ишончим комил, у «Аякс»га қарши ўйинда майдонга тушади», - деб Аллегри сўзларини келтирмоқда Sky Sport.
Эслатиб ўтамиз, Роналду март ойининг охирида Португалия терма жамоаси сафида сонидан жароҳат олган ва Италия чемпионатининг бир неча ўйинларини ўтказиб юборганди. Чемпионлар Лигаси чоракфиналидан ўрин олган «Аякс» - «Ювентус» ўйини 10 апрель куни ўтказилади.
«ИНТЕР» ФАНАТЛАРИ ҲАМОН ИКАРДИГА ҚАРШИ
«Интер»нинг Curva Nord фанатлар гуруҳи ҳужумчиси Мауро Икардига қарши эканликлари ҳақида «Аталанта»га қарши ўйиндан олдин яна бир бор баёнот беришди.
Аввалроқ, мухлислар аргентиналик футболчини асосий таркибда тушириб юборишни талаб қилишганди.
«Жуда муҳим ўйиндан олдин, яна бир бор ўз нуқтаи назаримизни баён қиламиз. Биз бошқа мухлисларни ўз қоидаларимизга мажбуран бўйсундирмоқчи эмасмиз. Биз мухлисларга «Интер»да кимни қўллаб-қувватлаш лозимлигини ҳам уқтирмоқчи эмасмиз.
Биз Икардини қўллаб-қувватламаймиз. У клубимизнинг келажаги бўлолмайди. У нега «Интер» футболкасини кийиб юролмаслигини айтиб, кейинчалик бу гапига баҳона излаганида, ўзига қабр кавлаб бўлган эди», - деб фанатлар баёнотини келтирмоқда Football Italia.
Эслатиб ўтамиз, Икарди февраль ойида «Интер»нинг сардорлик боғичидан маҳрум қилинди ва 1 ойдан зиёд вақт давомида таркибга киритилмади.
