«Реал»да йирик ғалаба, Италия дербисида ҳакамлик можароси. Кун ўйинлари

Англия: Ҳусанов ва жамоаси кейинги босқичда

«Манчестер Сити» – «Солфорд Сити»
Голлар: Доррингтон, 6 – автогол (1:0). Гейи, 81 (2:0)
«Манчестер Сити»: Траффорд, Стоунс (Гейи, 65), Ҳусанов, Айт Нури (О`Райли, 64), Аллейн (Макайду, 22), Гонсалес (Родри, 75), Рейндерс, Люис, Шерки, Фоден (Семенё, 65), Мармуш

«Манчестер Сити» ҳозирча Англия Кубогида тежамкор ўйин билан ҳам ғалабаларга эришмоқда: жамоага асосан қуйи лигалар вакиллари рақиб бўлмоқда ва ўйинлар «Этиҳад»да кечмоқда. Аммо ўтган босқичда «шаҳарликлар» «Эксетер» дарвозасига истаганча гол урган бўлишса (10:1), тўртинчи дивизион вакили бўлган «Солфорд» муносиб қаршилик кўрсатди. Ҳолбуки тезкор автоголдан кейин ушбу рақиб сочилиб кетиши кутилганди. Бу ўйинда дастлаб ҳимояда Ҳусановга Аллейн шерик сифатида тушганди, аммо ҳимоя чизиғидаги муаммолар туфайли январда «Уотфорд»дан қайтариб олган 20 ёшли ушбу футболчи бўлим ўрталарида жароҳат туфайли алмаштирилди. Ҳимоядаги муаммоларни ёпиш учун қишда олиб келинган футболчилардан яна бири Гейи эса иккинчи бўлимда захирадан майдонга тушиб, клуб сафидаги илк голини урди.

«Астон Вилла» – «Нюкасл Юнайтед» 1:3
Голлар: Абраҳам, 14 (1:0). Тонали, 63 (1:1). Тонали, 76 (1:2). Волтемаде, 88 (1:3)
«Астон Вилла»: Бизот, Линделёф, Пау Торрес, Дин, Богард, Дуглас Луис (Санчо, 78), Онана, Баркли (Буэндия, 65), Бэйли (Мартинес, 45+4), Роджерс (Матсен, 77), Абраҳам (Уоткинс, 65)
«Нюкасл Юнайтед»: Рамсдейл, Тшау, Берн, Ҳолл, Триппиер (А. Мёрфи, 90), Тонали, Рэмси (Уиллок, 80), Осула (Гордон, 63), Барнс, Ж. Мёрфи (Эланга, 63), Волтемаде
Огоҳлантиришлар: Дуглас Луис, 4. Дин, 42 – Тшау, 25. Барнс, 52. Рэмси, 55
Четлатиш: Бизот, 45

Англия кубоги 1/16 финал босқичидаги марказий баҳс эса Бруно Гимараэшсиз ўтди. «Нюкасл» сардори икки ойдан кўпроқ вақтга сафдан чиқиши клубига ҳам, Бразилия терма жамоасига ҳам жиддий зарба бўлди. Аммо Карло Анчелоттида «Астон Вилла»га қайтган Дуглас Луиз варианти ҳам бўлади. Ушбу футболчи «Ювентус»да ҳам, «Ноттингҳэм»да ҳам олдинги даражасига қайта олмади. Лекин у Бирмингҳэмда ўзини яна уйдагидек ҳис қилиши мумкин, жамоа яримҳимоя чизиғидаги муаммолар эса унга асосий таркибга йўл очади.

Айнан Дуглас Туркиядан АПЛга қайтган Абраҳамнинг ҳисобни очувчи голига ассистентлик қилди. У ўзини жарима зарбасини куч билан ижро этмоқчидек тутди, амалда эса кутилмаганда тўпни парашют услубида жонли девор устидан ошириб ташлади ва ҳимоячилар ортига очилган ҳужумчи дарвозани ишғол этди. 

Аммо биринчи бўлим охирида мезбонлар қўпол хатога йўл қўйишди ва рақибнинг хавфли қарши ҳужумини ўтказиб юборди. Дарвозабон Бизот рақибни қарши олиш учун олдинга чиқиб келди, аммо у Мёрфини тўхтатишда фол ишлатди ва қизил карточка олиб, майдонни тарк этди. Унаи Эмери бу вазиятда асосий айбдор бўлган Бэйлини майдондан олиб, дарвозага Эмилиано Мартинесни туширди.

Иккинчи бўлим давомида бир киши кўп бўлиб ҳаракатланган Эдди Ҳау шогирдлари ўйинни 180 даражага ўзгартиришди. Барчасини меҳмонлар рақиб жарима майдони атрофида тўпни олиб қўйган эпизодлар ҳал қилди. Гимараэш йўқлигида сардорлик боғичини ўзиники қилган Тонали узоқ масофадан зарба бериш маҳоратини намойиш этди. Биринчи ҳолатда рикошет ҳам қўл келган бўлса, иккинчи ҳолатда италиялик яримҳимоячи пастки бурчакни аниқ нишонга олди. Кейин эса Волтемаде ҳам 20 декабрдан буён илк голини урди ва рақибни узил-кесил таслим қилди.

«Ливерпул» – «Брайтон» 3:0
Голлар: Жонс, 42 (1:0). Собослаи, 56 (2:0). Салоҳ, 68 - пеналти (3:0)
«Ливерпул»: Алиссон, ван Дейк, Конате, Керкез, Собослаи, Макаллистер, Жонс (Рэмзи, 89), Вирц (Жо Гомес, 71), Киеза (Экитике, 77), Салоҳ (Нгумоҳа, 77), Гакпо (Ниони, 89)
«Брайтон»: Стил, Данк, ван Ҳекке (Боскали, 72), Ферди Кадиўғли, Велтман, Балеба (Рюттер, 62), Ҳиншелвуд (Виффер, 81), Гросс, Ҳауэлл (Минте, 62), Д. Гомес (Митома, 62), Костулас
Огоҳлантиришлар: Данк, 15. Д. Гомес, 33. Балеба, 41. ван Ҳекке, 67

«Ливерпул» «Брайтон»га қарши қийин кечган ўйиннинг биринчи бўлими охирида Жонснинг голи эвазига ўз мақсадига эришди. Кейин эса Алиссон ўз сейви билан жамоасининг минимал устунлигини сақлаб қолди. Иккинчи бўлимда Салоҳ катта саҳнага чиқди: у аввалига Собослаини голли узатма билан таъминлади, кейин эса пеналтини аниқ ижро этиб, ҳисобни йирик кўринишга келтирди. Арне Слот шогирдлари 1/8 финалга йўл олди.

Испания: «Сантяго Бернабеу»даги концерт

«Реал» – «Реал Сосиедад» 4:1
Голлар: Гарсия, 5 (1:0). Ойярсабал, 21 – пеналти (1:1). Винисиус Жуниор, 25 – пеналти (2:1). Валверде, 31 (3:1). Винисиус Жуниор, 48 – пеналти (4:1)
«Реал»: Куртуа, Рюдигер (Карваҳал, 60), Ҳаусен, Каррерас, Александр-Арнолд (Алаба, 60), Тшуамени (Сестеро, 79), Арда Гулер, Камавинга (Себалйос, 73), Валверде (Б. Диас, 73), Винисиус Жуниор, Гарсия
«Реал Сосиедад»: Ремиро, Субелдия, Хон Мартин, Айен Мунйос, Арамбуру, Горротчатеги, Эррера (Туррентес, 60), Уэсли (Гонсалу Гедеш, 46), Марин (Д. Диас, 73), Солер, Ойярсабал (Оскарссон, 60)
Огоҳлантиришлар: Ҳаусен, 20 – Туррентес, 90

Александер-Арнолд ниҳоят «Реал» бошланғич таркибига қайтди ва унга Гонсало Гарсияга голли узатма бериш учун беш дақиқа кифоя қилди. Ёш форвард қанотдан кўра марказий ҳужумчи позициясида самаралироқ эканини намойиш этди ва бир тегинишда ҳисобни очди. Арбелоа шу куни ЕЧЛ ўйини олдидан Мбаппега дам берганди ва ёш ҳужумчи бундай имкониятдан фойдаланмоқда. У Килиан тушмаган ёки захирадан чиққан ўйинларда 10 гол уришга улгурди.

Биринчи бўлим ўрталарида Ҳаусеннинг жарима майдони ичкарисидаги фолидан кейин белгиланган пеналтини Ойярсабал аниқ ижро этиб, ҳисобни тиклади. Аммо мезбонлар тезда ҳисобдаги устунликни тиклади. Винисиус Жуниор финт ишлатиб, Арамбуруни ўзига фол ишлатишга мажбур қилди ва 11 метрлик жарима зарбасини ўзи аниқ ижро этди. Шу куни марказий ҳимояга қайтган Валверде ҳам рақиб жарима майдони атрофида қанчалик хавфли эканини кўрсатиб қўйди – Каррерасдан узатма қабул қилиб олгач, навбатдаги чиройли голини урди.

Иккинчи бўлим бошида Винисиус яна бир бор Арамбуру билан дуэлдан кейин пеналти ишлади ва яна бир бор пеналтини намунали тарзда ижро этди. Шундан кейин ўйин қуруқ расмиятчиликка айланди, Арбелоа Алаба, Себалйос, Сестеро, Диас ва Карваҳалга ўйин амалиёти тақдим этди.

Қолган дақиқаларда меҳмонларнинг бир голи офсайд туфайли инобатга олинмади, кейин эса Винисиус Гулернинг узатмасидан кейин бош билан дарвозани ишғол этди, бу сафар ҳам офсайд ҳолати халақит берди ва ўйинда ҳисоб ўзгармай қолди.

«Қироллик клуби» ҳозирча яна биринчи ўринга чиқиб олди, «Барселона» эса душанба куни «Жирона»га қарши кечадиган ўйинда биринчи ўринни қайтариб олишга ҳаракат қилади.

Италия: Миландаги ўйинда ҳиссиётлар жўш урди

«Интер» – «Ювентус» 3:2
Голлар: Камбязо 17 автогол, Эспозито 76, Зелински 90 – Камбязо 26, Локателли 83.
«Интер»: Зоммер, Биссек, Аканжи, Бастони (Карлос Аугусто, 46), Луис Энрике (Луис Энрике, 66), Барелла (Чалхонўғли, 54), Зелински, Сучич (Диуф, 66), Димарко, Тюрам (Бонни, 86), Мартинес.
«Ювентус» Ди Грегорио, Калулу, Бремер, Келли, Камбязо (Опенда, 78), Локателли, Миретти (Копмейнерс, 61), Консейсау (Ҳолм, 46), Маккенни, Йилдиз (Бога, 75), Давид (Кабал, 61).
Огоҳлантиришлар: Бастони 9, Барелла 53, Чалхонўғли – Калулу 32.
Четлатиш: Калулу 42.

Италияда турнинг марказий учрашувида «Интер» сўнгги дақиқаларда «Ювентус»ни таслим этди. Аммо ўйин бош ҳаками Федерико Ла Пеннинг хатоси туфайли бу ўйин можаро билан ёдда қоладиган бўлди.

Биринчи бўлимда 1:1 ҳисоби қайд этилди. Икки гол ҳам «Юве» қанот ҳимоячиси Андреа Камбиязо номига ёзилди. 17-дақиқада у рақибларга ёрдам бериб юборганди: Лаутаро Мартинеснинг зарбасидан кейин тўп унинг оёғига тегди ва ундан дарвоза тўрига бориб тушди. Рикошет Микеле Ди Грегориони иложсиз ҳолатда қолдирди.

26-дақиқада Камбиязо ўз айбини ювди. Уэстон Маккенни тўпни жарима майдонига етказди, Жонатан Дэвид зарба беролмади, аммо Камбиязо олис устун яқинида тўпга етиб борди ва мувозанатни тиклади – 1:1. Бу «Ювентус» ва «Интер»нинг А Сериядаги учрашувларида бир футболчи ҳам автогол, ҳам гол уриши билан боғлиқ илк ҳолатга айланди.

Жамоалар тенгма-тенг ўйин кўрсатаётганди, аммо 42-дақиқада «Интер» бир киши кўп бўлиб қолди. Ҳакам Пиер Калулуга иккинчи сариқ карточкани кўрсатди.

Бу вазиятда Фабио Миреттининг ноаниқ пасидан кейин Калулу тўпни илиб кетган Алессандро Бастонига қўлини билинар-билинмас теккизди, шу билан бирга, унинг оёғига тегмади.

«Интер» ҳимоячиси эса актёрлик маҳоратини ишга солиб, газонга йиқилди, бош ҳакам Федерико Ла Пенна Калулуга иккинчи сариқ карточкани кўрсатди.

Бастони четлатишни арбитрнинг кўз ўнгида нишонлади.

У бу ҳолатда катта таваккалчиликка қўл урганди: унда аллақачон сариқ карточка бор эди, ҳакам унинг йиқилишини симуляция деб топганида, Калулуни эмас, уни майдондан четлатган бўларди. Аммо қоидага кўра, VAR иккинчи сариқ карточкага аралаша олмайди ва ҳакамнинг дастлабки қарори ўзгармади. Кристиан Киву эса Бастонини танаффусда захирага олди.

Иккинчи бўлимда «Интер» сон жиҳатдан устунликдан фойдаланиб, ташаббусни тўлиқ ўз қўлига олди ва Франческо Эспозитонинг голидан кейин ҳисобда олдинга чиқиб олди. «Юве» эса вақти-вақти билан қарши ҳужумлар уюштирди ва ҳисобни тенглаштиришга эришди. 83-дақиқада Мануэл Локателли Маккеннинг узатмасидан кейин жарима майдонига кириб бориб, олис бурчакни аниқ нишонга олди – 2:2!

Лекин бу ҳали ҳаммаси эмасди. 90-дақиқада «Интер» барибир ўз мақсадига эришди: Петр Зелински рақиб жарима майдони яқинида тўпни қабул қилиб олди ва чап оёғида қайтариб бўлмас зарба йўллади – 3:2!

Ўйиндан кейин трибуналар остидаги туннелга киришда туринликлар устози Лучано Спаллетти, унинг мураббийлар штабидаги Жоржо Киеллини ҳамда «Ювентус»нинг бошқа вакиллари ҳакамни ўраб олишди.

Бу ғалабадан кейин «Интер» турнир жадвалида олдинга чиқиб кетди: энди иккинчи ўриндаги «Милан» билан орадаги фарқ 8 очкони ташкил этмоқда (Аллегри жамоаси бу тур ўйинини энди ўтказади). «Юве» эса ҳозирча кучли тўртликда қолди, аммо бу турда «Рома» «Наполи» билан дуранг ўйнаса ҳам, бу ўринни тортиб олади.

«Интер» ва «Юве»ни навбатда Чемпионлар лигасида ўтиш ўйинлари кутмоқда (мос равишда «Будё-Глимт» ва «Галатасарой»га қарши).